Ахсынньы 18 күнүгэр Мэҥэ нэһилиэгэр М.П.Габышев аатынан орто оскуолатыгар Аҕа дойду Улуу сэриитин кыттыылааҕа, РСФСР үтүөлээх юриһа, уопсастыбаннай диэйэтэлэ, норуодунай судьуйанан киэҥник биллибит, ытыктыыр биир дойдулаахпыт Михаил Михайлович Сотников төрөөбүтэ 100 сылын бэлиэтиир, кини сырдык аатыгар сүгүрүйэр тэрээһин буолан ааста.
Тэрээһин оскуола үөрэнээччилэрин уус-уран ааҕыыларынан уонна судьуйа Михаил Сотников олоҕун сырдатар «Ытык киһи олоҕун сэһэнэ»диэн ааттаах И.М.Сосин аатынан улуустааҕы бибилэтиэкэ исписэлиистэрэ бэлэмнээбит видео сюжетынан саҕаланна.
Михаил Михайлович төрөөбүтэ 100 сылын бэлиэтиир, кини сырдык аатыгар сүгүрүйэр тэрээһини «Мэҥэ нэһилиэгэ»тыа сирин тэриллиитин баһылыга Александр Куприянов киирии тылынан арыйда.
Бу тэрээһиҥҥэ мустубут оскуолабыт үөрэнээччилэригэр, учууталларга, көрсүһүүгэ кэлбит дьоҥҥо Михаил Михайлович олорон ааспыт чаҕылхай олоҕун кинини кытта алтыспыт биир дойдулаахтара Мохначевскай Руслан Ефимович, Чалкин Семен Семенович.Аймахтарын ааттарыттан ахтыыны оҥордо сиэн быраата Бродников Илья Николаевич. Өр сылларга Саха Өрөспүүбүлүкэтин Үрдүкү Суутун судьуйатынан үлэлээбит,ыҥырыылаах ыалдьыппыт Михаил Михайлович төрөппүт уола Александр Михайлович Сотников ахтан-санаан аастылар. Кыттыыны ыллылар Мэҥэ Хаҥалас оройуоннааҕы суутун бэрэссэдээтэлин эбээһинэһин толорооччу Соловьев Афанасий Васильевич,саха эстрадатын ырыаһыта,сахалыы тыыннаах уол оҕо оскуолатын төрүттээччи Анатолий Бурнашев.Кини норуот ырыатын «Татыйаас барахсаны» толорбутун кэлбит дьон ытыстарын таһынан биһирээбиттэрин биллэрдилэр.Мэҥэ Хаҥалас улууһун баһылыгын социальнай уонна имиджевай бэлиитикэтигэр солбуйааччы Альбина Андреевна Григорьева эҕэрдэ тылынан уонна дириҥ ис хоһоонноох ахтыытынан Михаил Михайлович Сотников 100 сааһын бэлиэтиир,кини сырдык аатыгар сүгүрүйэр тэрээһин түмүктэннэ.
Ахтыыны оҥорбут дьон Михаил Михайловиһы төрөөбүт түөлбэтигэр ханна да үлэлээтэр куруук кэлэ турарын,аймахтарын,биир дойдулаахтарын өйүү сылдьарын,уолаттарыгар дойдутугар тапталын иҥэрбитин истиҥник ахтан аастылар. Тус үлэтин таһынан ат сүүрдүүтүн успуордун уонна саахыматы сайыннарыыга үлэлэспитин кэпсээтилэр. Бу тэрээһиҥҥэ кыттыбыт ыччаттарбыт,эдэр көлүөнэ кини аатын инникитин холобур оҥостуохтара.Балыктаахха биир уулусса Михаил Михайлович Сотников аатынан ааттаммыта.
Саха саарына Михаил Михайлович Сотников туһунан өйдөбүл үйэ-саас тухары ааттана туруохтун.
Мария Захарова
