Отчуот мунньаҕын нэһилиэк баһылыга Александр Куприянов иилээн-саҕалаан ыытта.
Олохтоохтортон Илья Бродников кииннэммит ититиини хааччыйар “Юпитер» чааһынай тэрилтэҕэ киирэн тоҥо сыстыбыт, олохтоох ОДьХХ хаһан ыларын, сир үлэтигэр мунаарар боппуруостарын ыйытта. «Хаххах» кэпэрэтиип үлэһиттэригэр социальнай бакыат, атын сиртэн кэлэр үлэһиттэргэ уопсай дьиэ тутуллуутун ыйытта.
Суругунан сир баайын, «Ростелеком» үлэтин, гаас ситимин тардыы, киинтэн ититиигэ холбонуу туһунан сурастылар. Үлэ бэтэрээнэ Егор Габышев гаас ситимин магистрала оттуур алаастарынан барыытын утарар. Кулууп дириэктэрэ Любовь Кычкина саҥа кулууп тутуута өрөспүүбүлүкэ инвест бырагырааматыгар киллэриллэригэр баҕа санаатын эттэ, өрөспүүбүлүкэҕэ киэҥ хабааннаах үлэ барарыгар салайааччыларга махтанна.
Биэнсийэлээх Иннокентий Никитин электроуот остоолболоро суулла туралларын, «Юпитер» тэрилтэ тоҥортуу сыспытын ОДьХХ үлэһиттэрэ ириэрбиттэригэр махтанна.
Оскуола үлэһитэ Евгений Протодьяконов гаас ситимэ киирдэҕинэ ОДьХХ үлэһиттэригэр сарбыллыы барыан сөбүн, анал идэлээх дьон ирдэниэҕин чопчуласта. Биэнсийэлээх Семен Кычкин ардахтатар сөмөлүөттэр кэмигэр ардах түһэрбиттэрэ абыраабытын, уматык сыаната үрдүү турарын эттэ.
Туһааннаах салайааччылар боппуруостарга толору хоруйдаатылар, нэһилиэнньэ мунаарар боппуруостарын кыалларын быһаардылар, боротокуоллаатылар.
Бөлөх салайааччыта Петр Попов Үөрэх министиэристибэтин Махтал суругун Үөрэҕирии сайдыытыгар өр сыллаах үтүө суобастаах үлэтин иһин биология учуутала Яна Габышеваҕа, Тыа хаһаайыстыбатын министиэристибэтин Махтал суругун Ньургун Габышевка дохсун ытыс доҕуһуолунан туттарда.
Александр Жирков уустук кэмҥэ дьонугар-сэргэтигэр хайдах дьаһанарга ыллыктаах сүбэлэрин биэрдэ.
Отчуоту 92 киһи иһиттэ, хаһааҥҥытааҕар да элбэх боппуруос туран дьон көхтөөхтүк кыттан Бырабыыталыстыба үлэтин биһирииллэрин биллэрдилэр.
Марелла Баишева.
