Сэтинньи 22 күнүгэр олохтоох култуура дьиэтигэр сылын аайы түөлбэлэр икки ардыларыгар ыытыллар «Идэһэ киэһэтэ‒2024» быыстапка-дьаарбаҥка буолан ааста.
Быйылгы тэрээһин идэһэ туттуута түмүктэнэр кэмигэр буоларын быһыытынан кыһыҥҥы хаһаас ас ‒ эт астан ас араас көрүҥэр ананан тэрилиннэ.
Быйылгы улуустааҕы аҕам саастаахтар бэстибээллэрин лауреата Вера Фадеева мустубут дьоҥҥо бэйэтин музыкальнай эҕэрдэтин тиэртэ.
Түөлбэлэр бары быыстапкаларын үрдүк таһымнаахтык быйылгы идэһэлэриттэн эт ас арааһыттан араас бүлүүдэлэри бэлэмнээн көрүүгэ туруордулар. Дьүүллүүр сүбэҕэ култуура дьиэтин дириэктэрэ Любовь Кычкина, «Арчы» уопсастыбаннай түмсүү салайааччыта Надежда Рожина, нэһилиэкпит тыа хаһаайыстыбатын исписэлииһэ Анастасия Чалкина үлэлэстилэр.
Быыстапкаҕа эт астан сонун бүлүүдэни, хас биирдии түөлбэ быыстапкатын тупсаҕайдык киэргэтиитин, сервировкатын сыаналаан үһүс миэстэни «Сайдыс» (сал. Мария Макарова), иккис миэстэни «Лесной» (сал. Мария Кычкина), бастакы миэстэни «Аартык» (сал. Сардаана Стручкова) түөлбэлэр ыллылар уонна кыайыылаахтарга анал грамоталар уонна урбаанньыт Николай Генеров полиграфия офиһыгар туттуллар сэртипикээттэр туттарылыннылар.
Быыстапка-дьаарбаҥкаҕа хаһаайыстыбаларын көрөн-истэн төлөһүппүт сүөһүлэрин, убаһаларын этиттэн аҕалан атыылаан дьон үөрэ-көтө атыыластылар. Элбэх атыыны тэрийбит «Саамай элбэх дохуоту киллэрбит дьиэ кэргэн‒2024» анал аат, сэмэй бэлэх Яна, Ньургун Габышевтарга туттарылынна.
Биирдиилээн кыттааччыларга ананан ыытыллыбыт күрэстэр бэрт сэргэхтик аастылар. «Сылгы оһоҕоһун бэлэмнээһин» ‒ бэриллибит биэс устуука оһоҕоһу ким саамай түргэнник тиэрэн, үрэн хаан кутуутугар бэлэмнииригэр күрэскэ бастакы Парасковья Дьяконова ‒ «Лесной», иккис Екатерина Ноговицына ‒ «Аартык», үһүс Елена Стручкова «Сайдыс» түөлбэ
буоллулар.
«Сахалыы лапсаны оҥоруу» күрэскэ эрдэ бэлэмнээн аҕалыллыбыт тэҥ састааптан лапса оҥорон, быһан мииҥҥэ кутуллардыы бэлэм оҥорууга ким эрдэ, хаачыстыбатын сыаналаан иккис миэстэ Мария Кычкина ‒ «Лесной, бастакы миэстэни Людмила Захарова ‒ «Аартык» түөлбэ ыллылар.
«Туйаҕы ыраастааһыҥҥа» түөлбэ эр дьоно кыттан, бары да оҥостон кэлбиттэрин, түргэннэрин үлэ хаачыстыбатын көрөн дьүүллүүр сүбэ үһүс миэстэҕэ Дьулус Цыпандин, иккискэ Андрей Докторов, бастакы миэстэҕэ Егор Чалкин таҕыстылар, анал грамотанан, сэмэй бирииһинэн бэлиэтэннилэр.
Салгыы ыһыылаах-хаһыылаах көрдөөх эстэпиэтэҕэ түөлбэ аайыттан сааһыттан тутулуга суох үс эр киһи, икки кэрэ аҥар састааптаах хамаандалар кытыннылар. Быйылгы көрдөөх эстэпиэтэ сытыы киирсиилээх, көрөөччүлэр бары хамаандаларга ыалдьан ыһыы-хаһыы бөҕөтүн түһэрэн улаханнык сэргэхсийдилэр уонна түмүккэ үһүс миэстэни «Леснойдар», иккиһи «Аартыктар», бастакыны «Сайдыстар» ыланнар кыайыылаахтар грамота, бириис туттулар.
Бу киэһэ бэйэ оҥорон таһаарбыт бородууксуйатыттан аукцион тэриллэн ыытылынна. Аукциоҥҥа урбаанньыт Николай Кириллин уонна эдэр пиэрмэр уолаттар Ньургун Габышев, Дьулус Говоров, Илья Мохначевскай кытыннылар. Аукциоҥҥа кыттан атыыласпыт дьон атыыларын тутан астыннылар.
Түөлбэ туһа диэн киирсибит, күрэхтэспит-кыттыбыт бары түөлбэлэргэ кулууп үлэһиттэрэ быйылгы кыстыгы бука бары этэҥҥэ туоруоҕуҥ, бу курдук үөрэ-көтө инники күөҥҥэ сылдьыҥ, түмсүүлээх буолуҥ диэн ис сүрэхтэн тахсар сылаас махтал тылларын анаатылар.
Мария Захарова. Балыктаах
