Кулун тутар 14 күнүгэр Балыктаахха өр сылларга оскуолаҕа математика учууталынан үлэлээбит СӨ Учууталларын учуутала, Мэҥэ Хаҥалас улууһун Бочуоттаах гражданина, педагогическай үлэ бэтэрээнэ Марфа Захаровна Федорова аатын үйэтитэр, дойдуга Дьиэ кэргэн, өрөспүүбүлүкэҕэ Оҕо саас сылларын кэрэһилиир математикаҕа 5‒6 кылаастарга дьиэ кэргэнинэн олимпиада ыытылынна.
Матта, Тарат, Төҥүлү, Тумул, Дьабыыл оскуолаларыттан 27 үөрэнээччи, 24 төрөппүт кытынна. Ыҥырыылаах ыалдьыттарынан Дьокуускайтан балта Галина Федорова, кыыһа Тыыллыма орто оскуолатын математика учууталынан, интэринээт иитээччитинэн үлэлээбит Валентина Терентьева буоллулар.
Үөрэнээччилэр,төрөппүттэр тус туһунан кылаастарга олорон биир тиэкиһинэн балтараа чаас устата 6 садаачаны суоттаатылар. Түмүк таһаарыытыгар оҕо уонна төрөппүт баалларын суумалара эбиллэр. Олимпиада буола турдаҕына арыаллаан кэлбит учууталлар математика учуутала Светлана Габышева Марфа Захаровна туһунан дириҥ ис хоһоонноох ахтыытын, үлэтин уопутун кэпсиир быыстапканы болҕойон көрдүлэр-иһиттилэр. Манна ытыктыыр учууталбыт уруоктарын былааннарыттан, бэйэни сайыннарыы конспектарыттан саҕалаан уруокка туттар бэйэтэ оҥорбут дидактическай, кылаас таһынан үлэни тэрийиитин матырыйааллара, дьоҕурдаах үөрэнээччилэри кытта үлэлээбит араас тематическай паапкалара, оҕолор садаачаны кэпсиир уруһуйдара туруоруллубуттар. Марфа Захаровна хаартыскаҕа түһэриинэн үлүһүйэрэ. Хаартыскаларга Балыктаах оскуолатын, бөһүөлэккэ ыытыллар араас тэрээһиннэри түһэрэн хаалларбыта. Сүүһүнэн хаартыскалар кичэллээхтик альбомнарга тиһиллибиттэрэ көрөөччүлэр болҕомтолорун тарта.
14-с төгүлүн ыытыллар олимпиада түмүгүнэн 5-с кылаастарга бастакы миэстэни Маттаттан Артур, Альбина Андросовтар ылар чиэстэннилэр. 5000 солк. туттулар. Иккиһи ылан Миша, Евдокия Ноговицыннар (Балыктаах) 3000 солк., үһүс миэстэҕэ Христофор, Вероника Дохунаевтар (Балыктаах) 2000 солк. бэлиэтэннилэр.
6-с кылаастарга Балыктаахтан Сайнаара, Татьяна Стручковалар бастаатылар, 5000 солк. ыллылар. Иккискэ Нарыйа, Варвара Березкиналар (Дьабыыл, 3000 солк.), үһүскэ Виталий, Зинаида Цыпандиннар (Балыктаах, 2000 солк.) таҕыстылар.
Түмүк тахсыар диэри үөрэнээччилэргэ интеллектуальнай турнир ыытылынна. Манна Ярослав Горохов (5 кылаас, Дьабыыл) бастаата. Вероника Эверстова (5 кылаас, Тумул) иккис, Артур Андросов (Матта) үһүс миэстэни ыллылар.
Педагогическай үлэ бэтэрээнэ Марфа Захаровна үөрэнээччитэ Мавра Говорова олохтообут анал бирииһин Сайнара, Татьяна Стручковалар, Винокуровтар дьиэ кэргэн олохтообут анал бириистэрин Березкиннар дьиэ-кэргэн (Дьабыыл) ылан үөрүүлэрэ үрдээтэ. Үлэ бэтэрээнэ Мария Габышева олохтообут анал бирииһин Дьабыыл орто оскуолатын математикаҕа учуутала Ольга Слепцова ылла.
Олимпиада призовой пуондун Марфа Захаровна кылаас салайааччытынан үлэлээбит, оскуолабыт 1964, 1965, 1973, 1977, 1985, 1989 сыллардааҕы выпускниктара үбүлээтилэр.
Ити курдук, ахсаан курдук ыарахан биридимиэти интэриэһиргэтэн, умсугуйан туран үөрэнэллэригэр бары сатабылын, билиитин биэрбит ытыктыыр учууталбыт Марфа Захаровна Федорова аатын үйэтитэр сыаллаах олимпиада үрдүк таһымнаахтык тэриллэн ыытылынна. Марфа Захаровна үөрэнээччитэ Галина Сотникова, эдэр кэллиэгэтэ Светлана Габышева настаабынньыктарын үлэтин салҕаан, Марфа Захаровна аймахтарын кытары ыкса сибээһи тутуһан үлэлии-хамсыыы сылдьаллар.
Мария Захарова.
