#всейсемьей
Балыктаах бөһүөлэгин биир эдэр ыала Ньургуйаана, Петр Стручковтар СӨ Тыа хаһаайыстыбатын министиэристибэтин иһинэн эдэр ыалларга сүөһү ииттинниннэр диэн көрүллүбүт «Уһун кутурук» бырагыраамаҕа хапсаннар икки эдэр сүөһүнү үс сылга ылбыттара. Ити иннинэ дьиэ хаһаайына сылгынан эрэ дьарыктанар былааннаах эбит. Эдэр дьон улаатан эрэр оҕолоругар сибиэһэй күөрчэх, үүт-сүөгэй, эт-ас наада эбит диэн санааҕа кэлэннэр «хотоно да суох олорон эмискэ санаммыт эбиппит» диэн билигин ол кэмнэри санаан күлсэллэр. Ол икки ынахтарын оҕолуун-уруулуун бары тэлгэһэҕэ тахсан күрүөҕэ баайан сайын устата ыабыттар. Сатаан да ыабат дьоҥҥо хата сымнаҕас Ньургуһун диэн ааттаах ынах түбэһэн абыраабыт. Ньургуйаана Ивановна төһө да сүөһүгэ сыстыбатах, билбэт да буоллар сотору-сотору бэтэринээрдэри кытта кэпсэтэн сүбэлэтэн, билбэтин быһаартаран киһи син сүөһүнү иитиэн сөп эбит диэн санааҕа кэлбиттэр. Аймахтарын көмөлөрүнэн хотон туттан көрөн-бүөбэйдээн сүөһүлэрин ахсаанын сыыйа элбэппиттэрин туһунан санаатын үллэстэр.
Ньургуйаана дьоно саха ынаҕын биэрбиттэрин тулуурдааҕын, аска талымаһа суоҕун, көрүүтэ кэм судургутун сөбүлээбиттэр. Ол гынан баран үүт туттарар сыалтан атастаһан кэбиспиттэр. Сайын аайы аҕалара Петр уолунаан Арсенныын Алаҕарга, өрүскэ оттоон күһүн биирдэ кэлэллэр. Ыал ийэтэ кыргыттарынаан ынахтарын ыан үүт туттараллар, оҕуруоттарын бүөбэйдииллэр. Эбии хаһаайыстыбалаах үчүгэй эрээри биир да күн өрөбүлэ суох иллэҥ бириэмэ суоҕа эрэйдээҕин, иккиэн тэрилтэҕэ үлэлиир буолан сарсыарда эрдэ турууну, киэһэ үлэ кэнниттэн ынах ыаһынын ыарырҕаталларын этэллэр. Күһүн эт атыылаан оҕолоругар туохха наадыйалларын ылаллар, онон оҕолоро ас-таҥас хантан кэлэрин билэн улааппыттар. Билигин уоллара мин бардахпына хайдах көрүөххүтүй, сүөһүнү аччатыҥ диир эбит. Стручковтар улахан кыыстара Мичийэ оскуоланы кыһыл көмүс мэтээлинэн бүтэрэн билигин ХИФУ-га төрдүс кууруска үөрэнэр. Уоллара Арсен М.П.Габышев аатынан Балыктаах орто оскуолатын туйгун үөрэнээччитэ, кыралара Надюша 9-с кылааска үчүгэйдик үөрэнэр. Аҕалара Петр Васильевич ОДьКХ оператора, ийэлэрэ оскуолаҕа психологунан үлэлиир.
Стручковтар дьиэ кэргэн билигин биир үөр сылгы,13 ынах сүөһүнү көрөн-харайан үлэ үөһүгэр сылдьаллар. Кыах-сэниэ баарына сүөһүнү-сылгыны иитэрбит үчүгэй диэн санаанан салайтаран бары ыарахаттары аахсыбакка олорорго тулуһаллар тыа сирин сэмэй үлэһит ыала Стручковтар.
Мария Захарова. Балыктаах
