Байыастарга күүс-сэниэ эптин диэн “Собо” аахсыйа ыытылынна

Майатааҕы Мария Лукина салайааччылаах “Түмэн” уопсастыбаннай холбоһук анал байыаннай дьайыыга сылдьар биир дойдулаахтарбытыгар көмөлөһөр сыаллаах элбэх аахсыйалары ыытан кэллэ.

Бу күннэргэ “Собо” аахсыйа ыытылынна. Манна нэһилиэктэртэн дьоммут-сэргэбит көхтөөхтүк кыттан балыгынан көмөлөстүлэр. “Дьол түһүлгэтэ” уопсастыбаннай кииҥҥэ үлэлиир Федора Наумова салайааччылаах иис сыаҕын куухунатыгар 2 күн устата 10 куул тоҥ балыгы ириэрэн, ыраастаан бэлэмнээтилэр. Манна Екатерина Шарина, Татьяна Лукина, Антонина Петрова, Антонина Куприянова, Полина Осипова, Федора Наумова, Ольга Захарова үлэлээтилэр.

Табаҕа орто оскуолатын кэлэктиибэ 5 куул, элбэх оҕолоох эдэр ийэ Акулина Устинова 2 куул, Степан Куличкин 1 куул, Дмитрий Титов, Павел Жирков о.д.а. балык аҕалан туттарбыттар. Ыраастаммыт балыгы “Сардаана”, “Мичил”, “Кэнчээри”, “Чуораанчык” уһуйааннар, В.П.Ларионов аатынан Майа орто оскуолатын үлэһиттэрэ хатаран, мээккэлээн, бакыаттаан биэрэллэр. Бу күннэргэ Хорообут оскуолата Октябрина Васильева көҕүлээһининэн 303 бэлэм бакыаттаммыт балыгы аҕалан туттарда.

Бу курдук кыайыыны аҕалар туһугар сулууспалыы сылдьар биир дойдулаахтарбытыгар тапталлаах төрүт астара күүстэригэр күүс эптин диэн бары көмөлөспүт дьоҥҥо «түмэннэр» махталларын биллэрэллэр.

 

Марелла Баишева.