Майа сэлиэнньэтин “Түмэн” уопсастыбаннай холбоһук салайааччыта Мария Лукина көҕүлээһининэн “Дьол түһүлгэтэ” уопсастыбаннай киин өрөмүөҥҥэ барбыт кэмигэр байыаннай дьайыы кыттыылаахтарыгар анаан от ыйыттан саҕалаан уопсастыбанньыктар эмтээх оту хомуйдулар. Кинилэр сайыҥҥы өттүгэр уоппускаҕа кэлэн барааччы байыаннай дьайыы кыттыылаахтарын таҥыннаран, харысхал, саһыарар сиэккэ, эмтээх оттору биэрэн көмөлөстүлэр.
Догдоҥо нэһилиэгин олохтооҕо, “Сахатранснефтегаз” тэрилтэ Бөкөтөөҕү учаастагын оператора Роман Морозов байыаннай дьайыыга сылдьар байыас убайа дронтан көмүскүүр трансформер плащ-балаакка наада диэбитигэр, Майа олохтоох дьаһалтатыттан көмө көрдөөбүт. Маныаха олохтоох дьаһалта “Түмэн” уопсастыбаннай холбоһуктуун сүбэ-мунньах тэрийэн, иистэнэр дьоҥҥо тахсыбыттара. “Түмэн” уопсастыбаннай холбоһук сүбэтин чилиэнэ Антонина Петрова трансформер плащ-балаакка таҥаһын кырыйан биэрдэ. Маны В.П.Ларионов аатынан орто оскуолаттан Мария Соловьева, Ф.Г.Охлопков аатынан орто оскуолаттан Татьяна Акимова оскуолаларын сыахтарын иистэнньэҥнэрин көҕүлээннэр, Бөкөттөн Юлия Иванова, Ньургуйаана Иванова, Ольга Кудрина, Руслан Захаров, Д.Ф.Ходулов аатынан норуот айымньытын дьиэтин костюмера Вера Быганова, “Кыталык” ОЫЭК костюмера Галина Безменова, “Түмэн” уопсастыбанньыктара Ариадна Филиппова, Маргарита Максимова, Анна Осипова, Валентина Петрова, Федора Наумова, Александра Борисова ылсаннар, кылгас кэмҥэ хаачыстыбалаахтык тигэн биэрдилэр.
Балаҕан ыйын 18 күнүгэр Роман Морозовка 50 устуука дронтан көмүскүүр трансформер плащ-балаакка туттарылынна.
Бу күннэргэ Майатааҕы Медико-социальнай экспертиза кэлэктиибэ бэйэлэрин үтүө санааларынан байыаннай дьайыы кыттыылаахтарыгар көмөлөһөн, эмтээх оттору бакыаттыырга ылсан үлэлии сылдьаллар. Майя Никитина салайааччылаах Александра Шарина, Парасковья Татаринова, Ньургуйаана Ксенофонтова уонна Любовь Левина кыайыы түргэнник кэлэрин туһугар салгыы көмөлөһөргө бэлэмнэр.
Марелла Баишева.