Балаҕан ыйын 5 күнэ – аан дойдутааҕы үтүө санааланыы күнэ.
Бу күн Дьокуускай куорат уокуругун дьаһалтатын дьиэтигэр анал байыаннай дьайыы кыттыылаахтарыгар көмөҕө кылааттарын киллэрсибит уопсастыбанньыктары уонна волонтердары өрөспүүбүлүкэтээҕи киин ыстаап наҕараадалаата. Манна Дьокуускайтан, Горнай, Ньурба, Бүлүү, Амма, Чурапчы, Үөһээ Дьааҥы, о.д.а. улуустартан бастыҥнар ыҥырыллан сырыттылар. Мээрийэ улахан саалатын толору волонтердары сэргэ, кинилэр холобурдарын үүнэр ыччакка тиэрдээри кадет оскуолатын, речной училище устудьуоннарын ыалдьыттаттылар, анал байыаннай дьайыы бэтэрээннэрэ кыттыыны ыллылар.
Майа сэлиэнньэтин “Түмэн” уопсастыбаннай холбоһуктан көхтөөх уопсастыбанньыктар уонна волонтердар Федора Наумова, Евдокия Семенова, Антонина Петрова, Ариадна Филиппова уонна Антонина Куприянова ыҥырыллыбыттар. Кинилэртэн түөртэрэ тиийэн Саха Өрөспүүбүлүкэтин Аҕаларын лигатын эппиэттиир сэкэрэтээрэ Майя Аргунованы, Саллааттар уонна мотуруостар ийэлэрэ Мария Емельянованы, бастыҥ ыччаты, оскуола оҕотун Артем Ларионовы, о.д.а. кытта “Ресурсный Центр добровольчества РС(Я)» салайааччыта Айыллаан Винокуровтан сибэкки дьөрбөтүн кытары “За оказание помощи участникам СВО” дастабырыанньалаах түөскэ иилинэр бэлиэнэн наҕараадаланнылар.
Санатан эттэххэ, Майатааҕы “Түмэн” уопсастыбаннай холбоһук салайааччы Мария Лукина көҕүлээһининэн анал байыаннай дьайыы саҕаланыаҕыттан алта хайысханан үлэлээбитэ. Манна Федора Наумова салайааччылаах иис сыаҕа, Евдокия Семенова салайааччылаах саһыарар сиэккэ өрүүтэ, Татьяна Попова салайааччылаах харысхал оҥоруута, Людмила Пивоварова салайааччылаах чүмэчи уонна суорҕан аахсыйалара, Майатааҕы оҕону сайыннарар киин үлэһиттэрин көмөтүнэн собо балык хатарыллан, оскуолалар күүстэринэн бакыаттанан анал байыаннай дьайыы кыттыылаахтарыгар үгүс көмө оҥоһуллубута.
Бэйэлэрин күүстэрин, бириэмэлэрин харыстаабакка күннэтэ илиилэрин сылааһын иҥэрэн кыайыы кэлэрин туһугар сыралаһан үлэлиир волонтердарбытын үрдүк наҕараадаларынан истиҥник эҕэрдэлиибит!
Марелла Баишева.