Улуус баһылыгын 2024 сыллааҕы үлэтин отчуота бүгүн, ахсынньы 12 күнүгэр, Баатара нэһилиэгиттэн саҕаланна.
Баһылык Дмитрий Тихонов дьаһалта үлэтин-хамнаһын отчуотун кэнники 3 сыллааҕы сүрүн көрдөрүүлэрин тэҥнэбил кыраапык, табылыысса көмөтүнэн улахан экраҥҥа көрдөрөн билиһиннэрбитэ дьоҥҥо ордук тиийимтиэ, сонун буолла.
Сыымахха нэһилиэнньэни кытары көрсүһүүгэ Саха Өрөспүүбүлүкэтин Судаарыстыбаннай Мунньаҕын (Ил Түмэн) дьокутаата, сиргэ сыһыаннаһыыга, айылҕа ресурсаларыгар уонна экологияҕа сис кэмитиэтин бэрэссэдээтэлэ Андрей Находкин, управлениелар, тустаах тэрилтэлэр салайааччылара кыттыыны ыллылар, олохтоохтор ыйытыыларыгар сиһилии хоруйдары биэрдилэр.
Олохтоох оскуола дириэктэрэ Геннадий Макаров кадеттарга аналлаах интэринээти тутууну туруорсалларын, учууталлары, эдэр исписэлиистэри олохсутар сыалтан урукку мастарыскыай дьиэтин уопсай дьиэҕэ уларытан тутууга кэккэ ыарахаттары көрсүбүттэрин бэлиэтээн эттэ. Николай Попов, Иннокентий Корякин, Василий Ходулов тыа хаһаайыстыбатын сайыннарыы боппуруостарын таарыйдылар. Сылтан сыл сүөһү ахсаана аччыыр, ыччат тыа хаһаайыстыбатыгар сыстыбат балаһыанньата үөскээтэ. Норуот дьокутааттара эдэрдэри тыа хаһаайыстыбатыгар угуйар сыалтан өр сыл үлэлээбиттэргэ анал босуобуйа курдук, о.д.а. суолу-ииһи, ньыманы толкуйдуохтара этэ диэн санааларын үллэһиннилэр. Урукку өттүгэр туттарбыт үүттэрин харчыта хаһан кэлэрин ыйыттылар, үүт сыанатын үрдэтэри, үрэххэ быһыты тутар наадатын ыйдылар. Ыраах сытар нэһилиэккэ анал идэлээх быраастар көһө сылдьар биригээдэнэн кэлэн дьону көрөллөрүн, анаалыс ылалларын тэрийэри, оптуобус сырыытын тупсарары, үүт тутар собуот сылы эргиччи үлэлиирин хааччыйары Зоя Захарова туруоруста.
Сахалартан бастакы Сэбиэскэй Сойуус Дьоруойун Ф.К.Попов дойдутугар сотору кэминэн күөх төлөн кэлэр буолбутунан, олохтоохтор эрдэттэн онуоха бэлэм буолалларыгар этилиннэ. Нэһилиэнньэ социальнай көмүскэллээх буолуутун кэлим киинин салаатын начаалынньыга Александр Игнатьев гааһы киллэриигэ нэһилиэнньэ ханнык араҥата субсидиянан туһанарын иһитиннэрдэ.
Андрей Находкин хардатын норуот дьокутааттара тыа хаһаайыстыбатын сайыннарыы боппуруостарынан бөлөҕүнэн да кэлэн үлэлииргэ, дьон санаатын истэргэ бэлэммит диэтэ. Ыччат тыа хаһаайыстыбатын дохуот киллэрэр, биисинэс көрүҥүн курдук ылыннаҕына ылсан үлэлиэн сөп диэн санаатын эттэ. Маны сэргэ кини олохтоох бэйэни салайыныы улахан реформата буолаары турарынан, дьонугар-сэргэтигэр бу туһунан сиһилии быһааран биэрдэ.
Баатара нэһилиэгин баһылыга Дмитрий Акимов түмүккэ үлэ-хамнас бары хайысхатыгар, чуолаан, суолу оҥорууга, гаас кэлиитигэр улуус дьаһалтатын кытта ыкса ситимнээхтик үлэлиэхпит диэн эрэнэрин биллэрдэ.
Баһылык отчуотугар Сыымахха 49 киһи сырытта.
Февронья ОХЛОПКОВА.
