Алтан нэһилиэгин саҥа култууратын киинигэр эстэпиэтэ устуоруйата саҕаланна. Олунньу 17 күнүгэр баатаралар В.К.Степанов аатын сүгэр 68-с култуура уонна успуорт эстэпиэтэтин былааҕын Алтан нэһилиэгэр аҕаллылар.
Көрүү үгэс быһыытынан оһуокай түһүлгэтиттэн саҕаланна. Мэҥэлии оһуокайы оскуола үөрэнээччитэ Константин Билюкин, ыччат киһи Дьулуур Попов уонна Мотрена Билюкина таһаардылар. Дьүүллүүр сүбэ оһуокай тутула ситэ тутуһуллубатаҕын, көтүтүү чааһын биир эрэ оһуокайдьыт көрдөрбүтүн бэлиэтээн туран, салгыы элбэхтик үөрэнэллэригэр сүбэлээтэ. Түмүккэ Мотрена Билюкина уонна Дьулуур Попов дипломант аатын ылан, өлөчөйдөр оһуокайдара 3,98 баалга сыаналанна. Түһүлгэҕэ барыта 29 киһи кыттыыны ылла.
Уус-уран оҥоһук быыстапкатыгар алтаннар 161 оҥоһугу туруордулар. Ирдэнэр көрүҥнэр баһыйар өрүттэрэ баалларын, чуолаан XIX үйэ дьахтарын мааны таҥаһын тиксибиттэрин сэргээн бэлиэтээтибит. Ол эрэн, салгыы төрүт иискэ, тимир оҥоһуктарга, муоска, ат тэрилигэр уонна симэҕэр тустаах болҕомто ууруллан үлэ күүһүрэригэр баҕа санаабытын эттибит. Быыстапка лауреаттарынан Александра Негнюрова, Степан Барабанов, Василий Тихонов, Сергей Матчитов, «Туой түмсүүтэ» ааттаннылар. Дипломант аатын дьүүллүүр сүбэ Наталья Стручковаҕа, Фекла Москвитинаҕа, Надежда Поповаҕа, Петр Билюкиҥҥа, «Уран иис», «Туос түмсүүтэ», «Куукула тумсуутэ», «Уран» түмсүүлэргэ иҥэрдибит. Алтан нэһилиэгин быыстапката 4,0 баалга сыаналанна.
Икки нэһилиэк доҕордуу көрсүһүүтүгэр 22:13 очконан кыайыыны Баатара нэһилиэгин олохтоохторо сурунан, дойдуларыгар кыайыы кынаттанан төнүннүлэр.
Сандаарыйбыт саҥа дыбарыаска сыымахтар уус-уран самодеятельностарын кэнсиэрин көрөөччү сылаас ытыһын тыаһынан көрүстэ. Сыл устата ырыа, уус-уран ааҕыы, үҥкүү хас биирдии кэлэктиибэ чочуйбут бастыҥ нүөмэрдэрин астына көрдүбүт. Түмүккэ, лауреат үрдүк аатын хуор кэлэктиибэ (салайааччы Георгий Попов), уус-уран ааҕыы (Августа Баишева), «Баатара уолаттара» эр дьон вокальнай ансаамбыла, үҥкүү кэлэктиибин толоруутугар «Дьиэрэҥкэй», «Синий платочек» үҥкүүлэр, эр дьон вокальнай триота, Дмитрий Акимов уонна Петр Санников сольнай ырыалара ааттаннылар. Кэнсиэр дипломаннарынан «Иэйии» дьахталлар вокальнай ансаамбыллара, Анна Борисова, үҥкүү бөлөҕүн «Куйуур» үҥкүүтэ уонна ыччат дьон туруорбут блоктара ааттаннылар.
Баатаралар кэнсиэрдэрэ 4,15 баалга сыаналанна.
Галия Сосина,
култуура уонна духуобунай сайдыы управлениетын иһитиннэрэр-мэтэдиичэскэй киинин салайааччыта.
