Ахсынньы 5 күнүгэр Ф.К.Попов аатынан Баатара орто оскуолатыгар «Рисование это тишина ума и музыка для глаз» диэн уруһуй уонна черчение учуутала Любовь Анатольевна Жиркова айар сэминээрэ үрдүк таһымнаахтык буолан ааста.
Улуус оскуолаларыттан уруһуй, черчение учууталлара ыалдьыттаатылар. Тэрээһин үөрүүлээх аһыллыытыгар оскуола дириэктэрэ Геннадий Макаров эҕэрдэлээтэ, «Кэрэли» улуустааҕы оҕону эбии үөрэхтээһин киин мэтэдьииһэ Евдокия Баишева «Педагог-маастар» үрүҥ көмүс анал бэлиэни туттарда. Улуустааҕы уруһуй учууталларын түмсүүтүн салайааччыта Айталина Флегонтова, Баатара түмэлин сэбиэдиссэйэ Альбина Ходулова эҕэрдэ истиҥ тылларын тиэртилэр, махтаннылар.
Аан маҥнай педагогическай үлэтин саҕалаабыт Мэлдьэхси оскуолатыттан бииргэ үлэлээбит кэллиэгэлэрэ пришкольнай интэринээт ыстаарсай иитээччитэ Надежда Андросова, үлэ, черчение учуутала Анатолий Охлопков оскуола аатыттан Махтал суругу туттардылар, эҕэрдэ тылы эттилэр.
Сэминээр сүрүн тэрээһининэн аһаҕас дьарыктар, маастар-кылаастар буоллулар. Аһаҕас дьарыгы Любовь Жиркова (Баатара), Аиза Владимирова (Ороссолуода), маастар-кылаастары Ольга Зедгенидзева (Аллараа Бэстээх), Айталина Флемонтова (Павловскай), Вера Неустроева (Баатара), Дария Птицына (Майатааҕы лиссиэй), Нам коллеһын устудьуона Эльза Эверстова умсугутуулаахтык ыыттылар, сэҥээриини ыллылар. Сэминээргэ Баатара оскуолатын үөрэнээччилэрэ олус көхтөөхтүк кытыннылар, тапталлаах учууталларыгар истиҥ эҕэрдэлэрин тиэртилэр.
Тэрээһин чэрчитинэн кэтэхтэн уруһуй куонкуруһа ыытылынна. Кыайыылаахтарга дипломнары уонна анал куубактары туттардылар. Айар мастарыскыай түмүктүүр чааһын Мария Попова салайан ыытта. Үгүс оҕону кэрэ эйгэтигэр уһуйар учууталбытыгар, үтүө суобастаах үлэһиппитигэр Любовь Анатольевнаҕа чэгиэн туругу, дьиэ кэргэнигэр дьолу баҕарабыт. Бары сэминээр кыттыылаахтарыгар айар аартыккыт арылла турдун диэн алгыспытын тиэрдэбит.
Мария Санникова (Баишева).
