Успуорт
Афанасий Илларионов.
Кулун тутар 1 күнүгэр Манчаары аатынан успуорт комплексыгар оҕо-ыччат успуордун оскуолатын чэпчики атлетикаҕа манеһыгар Харатааҕы успуорт лиссиэйин 1999 с. бүтэрбит Петя Колосов бирииһигэр үгэс быһыытынан ыытыллар аһаҕас өрөспүүбүлүкэ таһымнаах атах оонньууларыгар күрэхтэһии ыытылынна.
Бу күрэхтэһии Петя Колосов бииргэ үөрэммит оҕолорун көҕүлээһиннэринэн тэриллэр. Эдэр сааһыгар олохтон барбыт Петя Колосов оҕолорго биир кэскиллээх, күүстээх атах оонньооччу этэ. Улуус уонна өрөспүүбүлүкэ күрэхтэһиилэригэр өрүү бастыыра уонна миэстэлэһэрэ. Күрэхтэһии улуус физкултуураҕа уонна успуорка управлениетын уонна Манчаары аатынан өрөспүүбүлүкэ успуорт национальнай көрүҥнэригэр киинин халандаарын былааныгар киирбит күрэхтэһиилэр чэрчилэринэн ыытыллар.
Петя Колосов бирииһин быйылгы кыайыылаахтарынан ааттаннылар: 17-18 саастаах уолаттарга кылыыга Михаил Шарин (Майа) 26.99, Владислав Яковлев (Майа) 26.86, Станислав Брызгалов (Майа) 26.08, ыстаҥаҥа Михаил Шарин (Майа) 26.07, Оскар Салышев (Уус Алдан) 25.98, Владислав Яковлев (Майа) 25.71, куобахха Владислав Яковлев (Майа) 23.41, Оскар Салышев (Уус Алдан) 23.35, Станислав Брызгалов (Майа) 21.71 көрдөрүүлэннилэр. Үс көрүҥ түмүгүнэн: Владислав Яковлев (Майа) 75.98, Салышев Оскар (Уус Алдан) 74.93, Михаил Шарин (Майа) 73.87 көрдөрүүлээх инникилээтилэр.
Кыргыттарга кылыы. Матвеева Анастасия (Нам) 20.87. Устинова Эльвира (Хара) 20.61.
Ыстаҥа. Матвеева Анастасия (Нам) 21.23. Устинова Эльвира (Хара) 20.82. Куобах. Матвеева Анастасия (Нам) 17.69. Устинова Эльвира (Хара) 16.29. Үс көрүҥ түмүгүнэн. Матвеева Анастасия (Нам) 59.79. Устинова Эльвира (Хара) 57.72.
15-16 саастаахтар. Уолаттар. Кылыы. Семенов Максим (Майа) 28.26. Кутуков Артур (Нам) 23.94. Еникеев Сергей (Нам) 23.06. Ыстаҥа. Семенов Максим (Майа) 26.64. Еникеев Сергей (Нам) 23.04. Кутуков Артур (Нам) 22.99. Куобах. Семенов Максим (Майя) 22.43. Еникеев Сергей (Нам) 19.93. Кутуков Артур (Нам) 19.64. Үс көрүҥ түмүгүнэн. Семенов Максим (Майа) 77.33. Кутуков Артур (Нам) 66.57. Еникеев Сергей (Нам) 66.03.
Кыргыттар. Кылыыга Лена Попова (Нам) 21.13, Аина Сон (Дьокуускай) 21.09, Айыына Федорова (Майа) 19.27, ыстаҥаҕа Аина Сон (Дьокуускай) 20.41, Лена Попова (Нам) 20.15, Айыына Федорова (Майа) 20.09, куобахха Аина Сон (Дьокуускай) 16.21, Лена Попова (Нам) 15.69, Айыына Федорова (Майа) 15.50 көрдүүлээхтэр. Үс көрүҥ түмүгүнэн кыайыыны Аина Сон (Дьокуускай) 57.71, Лена Попова (Нам) 56.97, Айыына Федорова (Майа) 54.86 көрүүлээх ситистилэр. Кыайыылаахтар уонна призердар (биирдиилээн бары көрүҥнэргэ уонна үс көрүҥ түмүгүнэн) Манчаары аатынан өрөспүүбүлүкэ успуорт национальнай көрүҥнэригэр киинин мэтээллэринэн уонна грамоталарынан, харчынан уонна сэртипикээттэринэн, Петя Колосов дьоно уонна аймахтара, бииргэ үөрэммиттэрэ уонна успуордунан дьарыктаммыттара анаабыт бириистэринэн, олохтоох маастардар оҥорбут статуэткаларынан наҕараадаланнылар. Түөрт анал бириис туттарылынна.
Майа, Хара, Чүүйэ, Павловскай оскуолаларыттан, Уус Алдан, Нам улуустарыттан, Дьокууcкай куораттан кытыннылар. Майаттан И.Н.Скрябин, Намтан Н.А.Кейметинов, Чүүйэттэн Х.Е.Скрябин, Хараттан Л.И. Семенова о.д.а. куһаҕана суох ыстаннылар.
Күрэхтэһии аһыллыытыгар Петя Колосов бииргэ спортивнай лиссийи бүтэрбит табаарыстара ‒ улуус баһылыга Дмитрий Тихонов, улуус баһылыгын солбуйааччы Василий Филиппов, Петя Колосов төрөөбүт Нөөрүктээйи нэһилиэгин баһлыга Николай Федоров, успуорка улуус баһылыгын сүбэһитэ Валерий Исаков, улуус чэпчики атлетикаҕа федерациятын толорооччу дириэктэрэ, Ф.Г.Охлопков аатынан орто оскуола дириэктэрэ Андрей Захаров, кылааһын салайааччыта СӨ үтүөлээх учуутала Мария Сидорова, оҕо успуордун оскуолатын дириэктэрэ Петр Илларионов кытыннылар.
Сүрүн судьуйанан Петя Колосов тириэньэрэ, СӨ үтүөлээх тириэньэрэ, атах оонньуутугар СӨ уонна РСФСР успуорка маастара Борис Ильин, суруксутунан СӨ успуорка маастара Петр Илларионов үлэлээтилэр.
Күрэхтэһии пандемия кэмигэр тохтотулла сылдьан баран былырыыҥҥаттан сөргүтүллэн аны сыл аайы ыытыллыахтаах. Өрөспүүбүлүкэ былааныгар киирбит биир эппиэттээх күрэхтэһиинэн буолар.
