Майа сэлиэнньэтин дьаһалтатыгар арыгыны атыылыыр маҕаһыыннары кытыы сиргэ көһөрүү тула аһаҕас кэпсэтии буолла.
Кэпсэтиини Майа сэлиэнньэтин баһылыга Алексей Неустроев салайан ыытта. Тэрээһиҥҥэ оройуоннааҕы ис дьыала отделын начаалынньыга Василий Пономарев, оройуон прокурорун эбээһинэһин толорооччу Альберт Готовцев, Майа сэлиэнньэтин дьахталларын сэбиэтин бэрэссэдээтэлэ Екатерина Романова, бэтэрээн сэбиэтин бэрэссэдээтэлэ Павел Жирков, дьокутаат Васианна Птицына, полиция учаастактааҕы боломуочунайдара, сокуоннай саастарын ситэ илик оҕолор дьыалаларыгар иниспиэктэр, арыгы атыылыыр маҕаһыыннар бэрэстэбиитэллэрэ о.д.а. кыттыыны ыллылар.
Сэлиэнньэҕэ 2017 с. арыгыны атыылыыр 17 маҕаһыын баар эбит буоллаҕына, бүгүҥҥү күҥҥэ 5 маҕаһыын баара биллэр. Мантан биир маҕаһыын сайыҥҥыттан үлэтин тохтотон турар.
Майа сэлиэнньэтигэр арыгыны атыылыыр маҕаһыыннар үөрэх тэрилтэлэриттэн 1000 миэтэрэ тэйиччи туруохтаахтарын туһунан Мэҥэ Хаҥалас улууһун дьокутааттара быһаарыы ылыммыттара. Бу ирдэбилгэ олоҕуран, Майа сэлиэнньэтин баһылыга Алексей Неустроев арыгыны атыылыыр маҕаһыыннары киинтэн тэйитэн, кытыы биир сиргэ көһөрөргө этии киллэрдэ.
Этиини оройуоннааҕы ис дьыала отделын начаалынньыга Василий Понамарев, Мэҥэ Хаҥалас улууһун прокурорун эбээһинэһин толорооччу Альберт Готовцев өйүүллэрин, бүгүҥҥү күҥҥэ тахсар быһылааннар, дьон эчэйиитэ барыта аһыы утах содулуттан тахсарын тоһоҕолоон бэлиэтээтилэр. Элбэх нэһилиэнньэлээх Майа сэлиэнньэтигэр тустаах көҕүлээһин тоҕоостооҕун туһунан эттилэр.
Кэпсэтии кыттыылаахтара этиини эмиэ өйүүллэрин биллэрдилэр. Үүнэр көлүөнэ ыччаттарбытын, оҕолорбутун харыстаан, куттала суох эйгэни тэрийэр кэм уолдьаста, онон бу сытыытык турар боппуруос быһаарыллыыта хонтуруолга туруоҕа диэн буолла.
