Балаҕан ыйын 4 күнүгэр Уус Алдан улууһун киинигэр Бороҕоҥҥо Лөгөй аатынан болуоссакка Арассыыйа Дьоруойун Алексей Неустроевы биир дойдулаахтара уруйдаан-айхаллаан чиэстээтилэр.
Манна Иван Черкашин бэрэссэдээтэллээх “Аҕа дойду” (“Отечество”) диэн ааттаах Саха сиринээҕи байыаннай дьайыылар бэтэрээннэрин ассоциациятын кыттыылаахтара, Мэҥэ Хаҥалас улууһун аатыттан «Килбиэн» байыаннай дьайыылар бэтэрээннэрин түмсүүтүн салайааччы Николай Семенов, «Барс-2” этэрээт хамандыырын солбуйааччы, байыаннай дьайыы кыттыылааҕа Павел Торговкин, Арассыыйа 5 төгүллээх, Европа 2 төгүллээх, 2015 с. Аан дойду 49 киилэҕэ үрүҥ көмүс призера Василий Егоров, СӨ бырабыыталыстыбатын бэрэссэдээтэлин солбуйааччы Сергей Местников, успуорт миниистирэ Леонид Спиридонов о.д.а. Уус Алдан улууһун бас-көс дьоно кыттыыны ыллылар. Кинилэр биир дойдулаахтарын истиҥник эҕэрдэлээтилэр, хорсун быһыытыгар махтаннылар, киэн тутталларын биллэрдилэр. Өрөгөйдөөх тэрээһин иннинэ салайааччылары кытары истиҥ-иһирэх сэһэргэһиигэ Алексей Михайлович хорсун быһыытын сэргэ инники былааннарын сырдатта.
Уус Алданнар албан ааттаах уолларыгар УАЗ массыына бэлэхтээтилэр. Ыалдьыттар Үлэ Дьоруойа Михаил Готовцев сэрии Дьоруойа буолбут Алексей Неустроевтыын биир нэһилиэктэн – Тандаттан сылдьалларын ааһан аймахтыылар буолалларын биллилэр.
Бу күн иккис аҥарыгар Бороҕоҥҥо Николай Тарскай аатынан успуорт дыбарыаһа аһылынна. Илин Эҥэргэ суох баараҕай тутуу буолбутун көрбүт эрэ барыта сөхтө-махтайда. Үөрүүлээх тэрээһиҥҥэ эстрада сулустара Аскалон Павлов, Умсуура, Лэгэнтэй, Эрхаан ырыаларынан-тойуктарынан эҕэрдэлээн кытыннылар.
Марелла Баишева.
