Степан Андреев, педагогическай үлэ бэтэрээнэ.
Бүгүн, олунньу ый 29 күнүгэр Арассыыйа Бэрэсидьиэнэ Парламеҥҥа этиитигэр ордук сэҥээрэн үөрэхтээһин эйгэтигэр туһааннаах боппуруостары иһиттим. Ол курдук оскуолалар, оҕо тэрилтэлэрин хапытаалынай өрөмүөнүгэр анаан 2030 сылга диэри Федеральнай бүддьүөттэн 400 млрд. солкуобай көрүллүө диэн буолла. Бэрт сотору кэминэн «Молодежь России» диэн национальнай бырайыак үлэлээн барыахтаах. Бэрэсидьиэн үөрэхтээһин ис хоһоонугар, хамнас ааҕыытын саҥа моделыгар, биир кэлим экзамеҥҥэ (ЕГЭ), иккис сменаттан босхолонуу, үөрэнээччилэр профессиональнай ориентацияларын боппуруостарыгар тохтоото. Кини орто анал, үрдүк үөрэх ситимнэрэ салгыы сайдар суолларын ыйда. 40 университет материальнай базатын сайдыытыгар 400 млрд. солкуобай 2030 сылга диэри көрүллүөхтээҕин эттэ. «Кадры» диэн национальнай бырайыак, оҥоһулла сылдьарын, кини дойду сайдыытыгар сүҥкэн суолтатын иһитиннэрдэ.
Арассыыйа экономиката бөҕөргөөн иһэрин, аан дойдуга 5-с миэстэҕэ тахсыбытын туһунан итэҕэтиилээхтик эппитин күргүөмнээх ытыс тыаһынан бигэргэттилэр.