Мэҥэ Хаҥалас улууһун Араҥас нэһилиэгэр «Илии сылааһа» өрөспүүбүлүкэтээҕи уопсастыбаннай түмсүү саҥа салаата арыллан үлэтин саҕалаата.
Түмсүү «Хотууна» диэн аатынан сүрэхтэнэн, маҥнайгы баартыйа таҥаһын – 23 паара ичигэс кээнчэни уонна 12 устуука тактическай ырбаахыны тигэн бу күннэргэ Дьокуускайга тирэх пууҥҥа туттарда.
Түмсүү салайааччытынан Тарат бөһүөлэгин дьахтар кэмитиэтин бэрэссэдээтэлэ Лена Ивановна Цыпандина талылынна. Кини олохтоохтору иискэ көҕүлээн, быйыл саҥа арыллан үлэтин саҕалаабыт А.Д.Кулаковская аатынан саха балаҕаныгар түмсэннэр, бары биир киһи курдук турунан, кыайыыны чугаһатыыга бэйэлэрин сэмэй кылааттарын киллэрсэллэр. Матырыйааллары олохтоох иистэнньэҥ Надежда Николаевна Петрова быһан биэрэн, тэрилтэлэр далбар хотуттара саба түһэннэр, аҕыйах күн иһигэр байыастар кэтэр таҥастарын тиктилэр.
Лена Цыпандина анал байыаннай дьайыы саҕаланыаҕыттан ыла Хотун Төҥүлү филиалыгар иистэнэн, сүрэҕин баҕатынан, илиитин сылааһынан биир дойдулаахтарыгар, байыастарга көмөлөһөр сыаллаах күн бүгүнүгэр диэри илиитин араарбакка иистэнэн кэллэ. Аны төрөөбүт түөлбэтин дьонун көҕүлээн, түмэн үлэлии-хамныы сылдьар.
