Балаҕан ыйын 14 күнүгэр Майа сэлиэнньэтигэр улууска бастакы оскуола иннинээҕи оҕо тэрилтэтин тэрийбит Анна Егоровна Зыкова аата «Мичил» оҕо уһуйааныгар иҥэриллибитин бэлиэтиир мемориальнай дуосканы үөрүүлээх аһыы буолла.
Оройуон сэбиэтин дьокутааттарынан 45-с сиэссийэтигэр бу дьыл бэс ыйын 16 күнүгэр Майатааҕы «Мичил» оҕону сайыннарар кииҥҥэ Анна Зыкова аатын иҥэрии туһунан быһаарыы ылыныллыбыта. Бэс ыйын 30 күнүгэр кини аатын иҥэрии туһунан оройуон баһылыгын 1289 №-дээх дьаһала тахсыбыта.
Улуус уонна Моорук нэһилиэгин Бочуоттаах гражданина, үлэ бэтэрээнэ Анна Зыкова үтүө аата көмүс буукубаларынан суруллан арыллар күнүгэр улуус баһылыга Дмитрий Тихонов, Майа сэлиэнньэтин дьаһалтатын баһылыгын солбуйааччы Вячеслав Санников, улуус үөрэҕин управленниетын начаалынньыгын солбуйааччы Андрей Захаров, Васильевтар педагогическай династия бэрэстэбиитэллэрэ, бэтэрээннэр, ыҥырыылаах ыалдьыттар уонна оҕо уһуйаанын үлэһиттэрэ кыттыыны ыллылар.
Дуосканы арыйар чиэс Васильевтар педагогическай династия салайааччытыгар Дмитрий Васильевка, “Мичил” оҕо уһуйаанын сэбиэдиссэйэ Людмила Дьяконоваҕа, оройуон баһылыгар Дмитрий Тихоновка бэрилиннэ.
Иван Лукин.
