Ааспыт 2024 сылга Ленинград блокадатын 80 сылын туолбута.
Аҕа дойду Улуу сэриитигэр Кыайыыны уһансыбыт Ленинградскай фронт, Балтийскай флот дьоруойдарын уонна өстөөх иилии эргийиититтэн тостубатах Ленинград кыра оҕотуттан аарыма кырдьаҕаһыгар диэри хас биирдии олохтооҕун булгуруйбат санаата хаһан да умнуллуо суоҕа.
Олунньу 18 күнүгэр Улуу Кыайыы 80 сылынан «Эйгэ» култуура киинигэр Хотуҥ Төҥүлү нэһилиэгэр Нелли Кирилловна Стручкова ийэтин — Ленинград блокадатын кыттыылааҕа Анна Ивановна Картынен олорон ааспыт олоҕун сырдатар документальнай киинэ көрдөрүлүннэ.
Көрсүһүүгэ улуус бэтэрээннэрин сэбиэтин чилиэннэрэ Маргарита Максимова, Ульяна Шишигина уонна Дмитрий Егоров кытыннылар. Анна Ивановна Ленинград блокадатыгар тыыннаах хаалар иһин охсуһуутун уонна олоххо тардыһыыта күүстээх эрэ буолан ордубутун туһунан оҕолор сэргээн иһиттилэр.
Д.А. Егоров киинэни кэҥэтэн, эбии устан Анна Ивановна олорбут Төңүлүтүгэр көрдөрбүтүгэр биһиги махтанабыт. Дмитрий Аполлонович
«Ветеран убайым» ырыатынан көрсүһүүнү киэргэттэ. Анна Ивановна төрөппүт кыыһа, Төңүлү нэһилиэгин олохтооһо Нелли Кирилловна ийэтин туһунан истиң-иһирэх ахтыытын олуһун долгуйа иһиттибит.
Билиҥҥи эдэр ыччакка, чуолаан оскуола оҕолоругар, дьиңнээх олоҕу көрдөрөр-иһитиннэрэр олус наадалаах. Ыарахаттартан толлубат буоларга үөрэниэҕиҥ, олорон ааспыт дьоммут олохторун үөрэтиэҕиҥ, билиэҕиҥ, киэҥ туттуоҕуҥ!
Аня Степанова, Төңүлү
