Анал байыаннай дьайыыга кытта сылдьар биир дойдулаахтарбытын көрүстүлэр

Саха Өрөспүүбүлүкэтин бырабыыталыстыбата уонна уопсастыбаннаһа анал байыаннай дьайыы кыттыылаахтарыгар бары өттүнэн күүстээх өйөбүлү оҥороллор. Бу күннэргэ улууспут олохтоохторо, түмсүүлэрэ хомуйан ыыппыт аһын-таҥаһын, туттар тэрилин, улуустарын сонунун кэпсиир “Эркээйи” хаһыаты анал байыаннай дьайыыга кытта сылдьар биир дойдулаахтарбыт туттулар.  

Муус устар 7-17 күннэригэр Мэҥэ Хаҥалас улууһун дэлэгээссийэтэ Запорожье, Херсон уобаластарынан, Донецкай, Луганскай Норуодунай Өрөспүүбүлүкэлэринэн анал байыаннай дьайыыга кытта  сылдьар биир дойдулаахтарбытын, Доннааҕы Ростов госпиталыгар бааһыран киирбит 64-с биригээдэ уонна 114 пуолка буойуннарын көрсөн кэллилэр.

Дэлэгээссийэҕэ улуус баһылыга Дмитрий Тихонов, улуус ыксаллаах быһыыга-майгыга сулууспатын салайааччы Афанасий Максимов, нэһилиэктэр баһылыктара 1-кы Наахараттан Иннокентий Исаков, 1-кы Баатараттан Петр Андросов, 2-с Тыыллыматтан Айсен Спиридонов, Тараҕай нэһилиэгиттэн Юрий Порядин киирсэн сырыттылар. Муус устар 7-12 күннэригэр Ил Түмэн дьокутаата Захар Никитин тиийэн сылдьыста. Кини норуот дьокутааттара Андрей Находкин, Олег Марков уонна култуура уонна духуобунай сайдыы миниистирэ Афанасий Ноев, култуура коллеһын эр дьоно кыттыһан оҥорбут көмөлөрүн тиэрдибит. Дэлэгээссийэ 150-чэ буойуну көрсөн 2 туонна кэриҥэ курууһу тиэртэ.

Анал байыаннай дьайыыга Мария Лукина салайааччылаах “Түмэн” холбоһук ыытар аахсыйаларыгар улууспутуттан Нөөрүктээйи, Төҥүлү, Баатара, Хорообут, Тараҕай, 1-кы Тыыллыма нэһилиэктэрэ куруутун көхтөөхтүк кытталларын бэлиэтиир тоҕоостоох. Майаттан “Сырдык Айыы сыдьаайа” түмсүү, В.П.Ларионов аатынан орто агоротехнологическай хайысхалаах оскуола, Ф.Г.Охлопков аатынан орто оскуола, И.Г.Тимофеев аатынан лиссиэй, “Кэнчээри”, “Мичил”, “Сардаана”, “Чуораанчык” оҕону сайыннарар кииннэр үлэһиттэрэ, о.д.а. бакыаттаммыт балык миинин, үөрэнээччилэр суруктарын, харысхаллары, саа уоһун сабыыларын, блиндажнай чүмэчилэри, от чэйдэри, ыраастанар от нобуордарын, отон сироптарын оҥорон, бэрэски буһаран көмөлөстүлэр. Мантан сороҕо өрөспүүбүлүкэтээҕи “Якутия с тобой” ыстаапка, саллааттар уонна мотуруостар ийэлэрин кэмитиэтин салайааччытыгар Мария Емельяноваҕа туттарыллан ыытыллыбыта. Саҥа сылга үктэнэн баран Федора Наумова салайааччылаах “Түмэн” иис сыаҕыттан дойдутун көмүскүү 23 саллаат толору кэмпилиэги таҥнан барда. Евдокия Семенова салайааччылаах түмсүү 58 миэтэрэ усталаах 9 устуука харысхал сиэккэни өрөн ыытта.

Дойдуларын көмүскэлигэр сулууспалыы сылдьар буойуннарбыт дьонноругар-сэргэлэригэр ахсаабат кыһамньыларын, ис сүрэхтэн оҥорор көмөлөрүн иһин махталларын тиэртилэр. Уолаттарбыт кыайыы көтөллөөх этэҥҥэ сулууспалаан кэлэллэригэр бары биир сомоҕо буолан, көмө-өйөбүл буола туруоҕуҥ.

 

Марелла Баишева.