Дойдубут көмүскэлигэр анал байыаннай дьайыыга сылдьар дьон оҕолоругар анаан ахсынньы 26 күнүгэр Д.Ф.Ходулов аатынан култуура киинигэр Саҥа дьыллааҕы бырааһынньык буолла.
Манна кэлбит Майа сэлиэнньэтин оҕо уһуйаанын иитиллээччилэригэр, оскуола оҕолоругар култуура киинин кэлэктиибэ оонньуулаах испэктээк көрдөрдүлэр уонна хас биирдии оҕоҕо минньигэс бэлэхтэри туттардылар. Оҕолор араас дьикти-кэрэ маскарааттарын кэтэн, киэргэнэн-симэнэн, туруорууну сэҥээрэн көрдүлэр, Моруос оҕонньору, Хаарчаана кыыһы кытта хоробуоттаатылар уонна бэһиэлэй оонньууларга көхтөөхтүк кытыннылар.
«Сылын ахсын ыытыллар «Үтүө санаа харыйата» аахсыйаҕа быйыл олус элбэх үтүө санаалаах, көхтөөх дьон, дьиэ кэргэннэр, тэрилтэлэр кытыыны ыллылар, – Майа сэлиэнньэтин дьаһалтатын дьиэ кэргэн киинин салайааччыта Владлена Павлова иһитиннэрдэ. – Бу аахсыйаҕа анал байыаннай дьайыы кыттыылаахтарын оҕолоругар анаан минньигэс бэлэхтэри хомуйдубут уонна бүгүҥҥү тэрээһиҥҥэ туттардыбыт.
Дьаһалта кэлэктиибин аатыттан аахсыйа бары кыттыылаахтарыгар, алыптаах, аптаах испэктээги туруорбут култуура киинин кэлэктиибигэр барҕа махтал! Барыгытын кэлэр иһэр Саҥа дьылынан итиитик истиҥҥик эҕэрдэлиибит!».
Иван Лукин.
