Бүгүн, от ыйын 14 күнүгэр, Кыыс Аммаҕа успуорт адаптивнай көрүҥнэригэр «Дьулуур» XIV өрөспүүбүлүкэтээҕи ыспартакыйаада үөрүүлээхтик аһылынна.
«Олимп» стадиоҥҥа өрөспүүбүлүкэбит араас муннуктарыттан кэлбит 24 хамаанда параадтаан киирдэ.
Мэҥэ Хаҥалас улууһун сүүмэрдэммит хамаандатын улууспут баһылыга Дмитрий Тихонов салайда.
Ыспартакыйаада кыттыылаахтарын, ыраахтан-чугастан кэлбит ыалдьыттары СӨ Ил Дархана Айсен Николаев, Арассыыйа Паралимпийскай кэмитиэтин вицэ-бэрэсидьиэнэ, Паралимпийскай оонньуулар чөмпүйүөннэрэ, призердара Иван Потехин, Амма улууһун муниципальнай оройуонун баһылыга Степан Кузьмин эҕэрдэлээтилэр.
Ил Дархан бэйэтин эҕэрдэ тылыгар Саха сиригэр адаптивнай успуорт тэтимнээхтик сайдан иһэрин, араас таһымнаах күрэхтэһиилэргэ спортсменнарбыт үрдүк көрдөрүүлэри ситиһэн өрөспүүбүлүкэбитин аатын чиэстээхтик көмүскүүллэрин, сыллата б’у көрүҥнэргэ дьарыктанар дьон ахсаана эбиллэн иһэрэ үтүө холобур буоларын бэлиэтээтэ.
Ыспартакыйаада былааҕын көтөҕөр чиэс ааттаах-суоллаах бастыҥ спортсменнарга тигистэ. Кинилэр ортолоругар биир дойдулаахпыт, РФ чэпчэки атлетикаҕа успуордун маастара, пауэрлифтиҥҥэ успуорт маастарыгар хандьыдаата, бу көрүҥнэргэ Арассыыйа сүүмэрдэммит хамаандатын чилиэнэ, Европа уонна аан дойду чөмпүйүөнэ, Арассыыйа биэс төгүллээх чөмпүйүөнэ Айаал Сивцев баарын киэн тутта бэлиэтиибит.
«Дьулуур» ыспартакыйаада уота умайда!
Алена Докторова
