Нөөрүктээйи нэһилиэгэр оһуокай уонна быыстапка көрүүтүн түмүгэ Нөөрүктээйи түөлбэтигэр ыччат дьон оһуокайы төрүттээн саҕалаатылар. Валерия Анисимова Илин эҥэрдии оһуокайы иилээн — саҕалаан, үрүҥ күн үҥкүүтүн уратытын толору көрдөрдө, иһитиннэрдэ. Кэлэр кэнчээри ыччаппыт, Анита Лаврентьева төрөөбүт төрүт түөлбэтин ырыатын-тойугун Мэҥэлии оһуокайы төрүттээн көлүөнэлэр ситимнэрин олохтоото. Улахан дьоҥҥо Матрена Колосова Бүлүү бөлөх оһуокайын тутулун толору баһылаан, кытыыларыгар кыттыспыт бар дьонун биир тэтимҥэ киллэрэн үтүө түһүлгэни төрүттээтэ. Нөөрүктээйи нэһилиэгин оһуокайдьыттара үс түөлбэ үҥкүүтүн арааһын көрдөрөн эҕэрдэлээх эһиэкэй, омуннаах оһуокай оонньуутун олохтоотутар. Көрүү түмүгүнэн Нөөрүктээйи оһуокайа 4,05 баалынан сыаналанна.
Уус-уран оҥоһуктарын быыстапкатыгар нэһилиэк талааннаах уустара, иистэнньэҥнэрэ, уран тарбахтаахтар түмсүүлэрэ кытыннылар. Ыйыллыбыт балаһыанньаҕа олоҕуран теманы арыйар кылтан, сиэлтэн үлэлэр, ат симэҕэ, паннолар, туойтан, туостан, мастан, алтан тимиртэн уус-уран оҥоһуктар бэлиэтэннилэр. Барыта 200 — чэкэ үлэ сыаналанна. Үрдүк сыанабылы Сивцев Василий Васильевич, Старостина Наталья Ивановна, Михайлова Наталья Дмитриевна, Осипова Людмила Егоровна, Флегонтова Айиалина Авксентьевна, Скрыбыкин Николай Ильич, Дмитриев Владимир Николаевич, Оконешникова Наталья Николаевна, Оконешникова Марина Дмитриевна, Иванова Татьяна Дмитриевна, Неустроева Евдокия Артемовна, Федотова Мария Петровна, Яковлева Сахая Дмитриевна, Иванов Захар Захарович, Иванов Альберт Александрович. Нөөрүктээйи бөһүлүөгүн быыстапката 3,98 баалынан сыаналанна.
Аллараа Бэстээхтэр уус-уран самодеятельноһын кэнсиэрэ Аллараа Бэстээх уус – уран самодеятельноһын кэнсиэрин олохтоох дьон кулуупка толору мустан олорон көрдүлэр. Кэнсиэр тутула, ис хоһооно ыйыллыбыт тиэмэнэн толору чочуллубут. Ыытааччылар икки тылынан сатабыллаахтык кэнсиэри салайан ыыттылар, хас биирдии нүөмэр толору бэлэмнээх, саҥаттан саҥа арыйыылаах сырдык түһүлгэ буолла. Уотунан – күөһүнэн, тыаһынан киэргэтиитэ аныгы аппаратуранан табыгастаахтык туһаныллан, хас биирдии нүөмэргэ ситэрэн, тупсаран биэрэрэ биһирэнэр. Кэнсиэр уопсайа доҕордоһуу сыһыантан, коллектив биир ситимнээх үлэтиттэн түмүллэн биир тыынынан, өрө көтөҕүллүүлээхтик ааста. Дипломаннарынан буоллулар: “Ай — тыын” үҥкүү бөлөҕө “Дьиэрэҥкэй”, фольклорнай бөлөх «Айыллыы» — «Дэриэбинэ оло5о» чабырҕах, хор «Тыыннаахтар умнубат сыллара», трио, Дмитрий Соловьев, “Кусчуттар ” сценка, “Клоунада” – “Параллель” ыччат театральнай коллектива. Лауреаттарынан буоллулар: хор «Мэҥэлэр Өрөгөй ырыалара», фольклорнай бөлөх «Айыллыы» толоруутугар “Орто додйу айыллыы” композияция, “Талба ” дьахталлар вокальнай ансаамбыла “ Төгүрүк алааскын эн таптаа”, «Толомон» эр дьон ансамбла “Манчаары”, уус – уран ааҕыы «Вечная слава Героям», “Ай — тыын” үҥкүү бөлөҕө «Синий платочек», «Дьолуо», соло Надежда Захарова “Үөрүү”, “Сыккыс ” народнай театр “Кусчуттар” уонна кэнсиэри түмүктүүр ыччат түһүмэҕэ. Кэнсиэр – 4, 19 баалынан сыаналанна.
Мэҥэ Хаҥалас улууһугар култуура уонна спорт эстафетата үтүө үгэскэ кубулуйан үйэлэри уҥуордаан бар дьоммутун түмсүүгэ, сомоҕолоһууга, сайдыыга, кэрэҕэ сирдиир.
