Олунньу 14-15 күннэригэр, Чурапчытааҕы “Айылгы” норуот айымньытын дьиэтигэр “Алыптаах маска–2025” өрөспүүбүлүкэ норуодунай тыйаатырдарын көрүү бэстибээлэ ыытыллынна.
Манна Сунтаартан, Үөһээ Бүлүүттэн, Горнайтан, Амматтан, Хаҥаластан, Мэҥэ Хаҥаластан, Амматтан, Чурапчыттан уонна Хатастан – барыта холбоон 15 (ол иһигэр 3-һэ кэтэхтэн) норуот тыйаатырдарын айылҕаттан айдарыылаах, талба талааннаах 205 артыыстара икки күн устата, Чурапчы улууһун олохтоохторугар анаан бэйэлэрин үлэлэрин билиһиннэрдилэр. Дьүүллүүр сүбэҕэ үлэлээтилэр: бэрэссэдээтэл Нерюнгритааҕы судаарыстыбаннай куукула тыйаатырын уус-уран туруорар чааһын сэбиэдиссэйэ Николай Пономарев, СӨ ускуустубатын үтүөлээх диэйэтэлэ, Алексей уонна Матрена Павловтар салайар Үүнэр көлүөнэ судаарыстыбаннай тыйаатырын кылаабынай режиссера Александр Титигиров, СӨ култууратын үтүөлээх үлэһитэ Юрий О, Былатыан Ойуунускай аатынан Саха академическай тыйаатырын литэрэтииринэй чааһын үлэһитэ, театровед Надежда Осипова, СӨ култууратын туйгуна, Саха сирин норуот тыйаатырдарын кураатара Алексей Захаров икки күн устата олус умсугутуулаахтык үлэлээтилэр.
Быйылгы “Алыптаах мааска-2025” күрэххэ биһиги улууспутуттан 3 кэлэктиип — Д.Ф.Ходулов аатынан Майатааҕы норуот тыйаатыра (режиссер Данил Осипов), Эдэр көрөөччү норуот тыйаатыра (Александра Скрябина) уонна Аллараа Бэстээхтээҕи “Сыккыс” норуот тыйаатыра (Мария Владимирова) кыттыыны ыллылар. Бэлиэтээн эттэххэ, Эдэр көрөөччү норуот тыйаатыра маннык таһымнаах улахан тэрээһиҥҥэ, улахан артыыстары кытта тэҥҥэ күрэхтэһэр бастакы кыттыыта буолар.
Уопсай түмүккэ биһиги дьоммут: Д.Ф.Ходулов аатынан Майатааҕы норуот тыйаатыра “Режиссер бастыҥ үлэтэ” анал аат (У.Захаров, “Бастакы” испэктээк); Эдэр көрөөччү норуот тыйаатыра “Бастыҥ эр киһи оруола” анал аат (Костя Слепцов Авалбек оруолугар); “Бастыҥ тыаһынан-ууһунан киэргэтии” (Ч.Айтматов “Саллаат оҕото” испэктээк) анал ааттары ыллылар.
Аллараа Бэстээхтээҕи “Сыккыс” норуодунай тыйаатыр “Ытык аартык” испэктээгинэн көрүү бэстибээл муҥутуур кыайыылааҕынан буолла.
Кэлэр “Алыптаах мааска” өрөспүүбүлүкэ норуодунай тыйаатырдарын көрүү бэстибээлэ биһиги дойдубутугар, Аллараа Бэстээххэ ыытыллар буолла.
Кэрэни кэрэһэлиир режиссердарбытыгар, арыыстарбытыгар, тыйаатыр ускуустубатын сэҥээрээччилэригэр өссө элбэх ситиһиилэри, үрдүк чыпчааллары, биллэр-көстөр үтүө түмүктэри баҕарабыт!
