Бүгүн, олунньу 1 күнүгэр, Аллараа Бэстээххэ Арассыыйа Генеральнай борокуруорун солбуйааччы Дмитрий Демешин уонна Саха Өрөспүүбүлүкэтин Ил Дархана Айсен Николаев төрөппүт көрүүтэ-истиитэ суох хаалбыт оҕолорго саҥа дьиэ күлүүстэрин туттардылар.
Өрөспүүбүлүкэҕэ оробуочай сырыынан кэлэ сылдьыбыт Дмитрий Викторович саҥа дьиэҕэ киирбит ыччаттары эҕэрдэлээтэ. Тулаайах хаалбыт оҕолорго болҕомтону ууруу борокуратуура өртүттэн улахан хонтуруолга турарын бэлиэтээтэ. Ааспыт сылга борокуратуура бфлаас уорганнарын кытта үлэлэспитин түмүгэр 120 төрөппүт көрүүтэ-истиитэ суох хаалбыт оҕо дьиэнэн хааччыллыбыт, 160 гражданин дьиэ-уот сэртипикээттэрин туппуттар. Күн-бүгүн маннык хамсааһын салҕанар.
Аллараа Бэстээххэ маннык бырагырааманан Кузьма Осипович Гаврилов аатынан уулуссаҕа тутуллубут түөртүү кыбартыыралаах толору хааччыллыылаах икки дьиэни олохтоох тутуу тэрилтэтэ тутан үлэҕэ киллэрдэ. Александр Колесов, Эдуард Слепцов, Игорь Варфоломеев, Евгений Мартынов, Павел Бочкарев, Антон Захаров, Игорь Павлов, Виталий Реутов саҥа дьиэ хаһаайыннарынан буоллулар. Күлүүстэри туттарыы үөрүүлээх тэрээһинин кэнниттэн ыалдьыттар дьиэлэммит ыччаттары кытта дьиэлэри көрдүлэр-иһиттилэр. Хаачыстыбалаах, сырдык-ыраас, автономнай гаас ситимигэр холбоммут кыбартыыраларга салгыы этэҥҥэ олороллоругар, дойдуларыгар туһалаах дьон буолалларыгар баҕа санааларын тиэртилэр.
Бэйэбит кэр.
