Күн иккис аҥарыгар отчуоттуур бөлөх улуус киинигэр Аллараа Бэстээххэ олохтоохтору кытта көрүстэ.
Нэһилиэнньэттэн бастатан туран сытыы боппуруоһунан сыллата таарыллар сыбаалка уонна куһаҕан ууну ыраастыыр ыстаансыйа суһаллык тутулла охсоро буолла. Сир-уот кыараҕас буолан боппуруос суһаллык быһаарыллара күчүмэҕэйдээх, үрдүкү салалта эрэ быһаарар кыахтаммытын, онон көмөлөһөллөрүгэр санааларын тиэртилэр. Уунан хааччыллыы эмиэ сытыы боппуруос буолбут. Ол быыһыгар федеральнай суолга бөһүөлэккэ киириигэ-тахсыыга «Платон» диэн ааттанар ыарахан уйуктаах массыыналартан нолуок хомуйар тэрил туруоруллубута боростуой уу баһар массыыналаах суоппарга кыһалҕаны үөскэппитин туораталларыгар көрдөстүлэр. Кыаммат араҥаҕа ууну таһар массыыналаахтар кыһамматтарын, улахан емкостаахтарга эрэ куталлара баар суол буоларын аҕыннылар.
Уматык тоҕо ыаратыллан иһэрин, байыаннай дьайыы кыттыылаахтарыгар учаастагы биэрии, ОДьКХ төлөбүрүгэр чэпчэтии туһунан ыйыталастылар. Буойун элбэх оҕотунан учаастагы эрдэ ылбыт буоллаҕына атын учаастак тоҕо бэриллибэтин туоһуластылар. Олохтоохтор ирбис сыанатын хонтуруоллуур наадатын туруорсаллар.
Бөлөх салайааччыта Петр Попов түмүккэ улууспутугар отчуот туруоруллуутун туһунан санаатын үллэһиннэ.
‒ Оройуон 31 нэһилиэгэр отчуоту туруордубут, нэһилиэнньэттэн 2200-тэн тахса олохтоох кыттыыны ылбытын бэлиэтиибит, ити ааспыт сыллааҕар элбэх. Олохтоохтор көхтөөхтүк кыттан өрөспүүбүлүкэ таһымыгар интэриэһиргиир боппуруостарын хото ыйыттылар. Сүрүннээн тыа хаһаайыстыбатын, электроэнергия, хомунаалынай хаһаайыстыба тула буолла, бары туһааннаах ыйытыыларга эппиэттэри ыллылар. Биллэн турар, олоххо киириилэрэ кэми-бириэмэни уонна үбүлэниини эрэйэллэр. Быйылгы сылга ити киирбит боппуруостарынан үлэлэһэргэ соруктары туруоруннубут.