Ахсынньы 10 күнүттэн саҕаламмыт улуус баһылыгын быйылгы сыллааҕы үлэтин отчуоттуур мунньаҕа бүгүн, ахсынньы 25 күнүгэр, улуус административнай киининэн ‒ Аллараа Бэстээх бөһүөлэгинэн түмүктэннэ.
Култуура киинигэр ыытыллыбыт отчуот мунньаҕар 130 киһи сырытта. Улуус баһылыга Дмитрий Тихонов салайааччылаах отчуоттуур бөлөххө СӨ Судаарыстыбаннай мунньаҕын (Ил Түмэнин) дьокутаата Андрей Находкин, улуус баһылыгын солбуйааччылара Альбина Григорьева, Василий Филиппов, дьаһалта бары управлениеларын, хаһаайыстыбаннай тэрилтэлэрин салайааччылара, эппиэттээх үлэһиттэрэ кытыннылар. Мунньаҕы «Аллараа Бэстээх бөһүөлэгэ» куорат түөлбэтин баһылыга Юрий Колмаков салайан ыытта.
Олохтоохтортон отчуот сүнньүнэн бөһүөлэк күннээҕи түбүктэригэр уонна кэскиллээх соруктарыгар сыһыаннаах үгүс ахсааннаах ыйытыылар, туруорсуулар киирдилэр.
Саламу Абубакаров саҥа оскуола тутуутун, «Парус» успуорт киинин сиригэр-уотугар күһүн-саас киирии суолун оҥорууну, Николай Федоров сыбаалка миэстэтин көһөрүүтүн, Сардаана Прибылых доруобуйаларынан хааччахтаах оҕолорго психологическай-медицинскэй-социальнай кэтээн көрүүнү оҥорор киин филиала аһылларын, инбэлиит оҕолор оптуобуһунан айанныыр төлөбүрдэригэр чэпчэтии олохтонорун, Валентина Резепова бөһүөлэк иһигэр дьону таһар биир оптуобуска иккиһи көрүүнү, Вероника Свинобоева «Саха сирин экологическай систиэмэтэ» ХЭТ оҥорор өҥөтүн толору уонна хаачыстыбалаахтык оҥорорун ситиһэргэ ирдэбил туруорары, Анатолий Егоров иһэр уу хаачыстыбатын тупсарыыга ыраастыыр ыстаансыйа тутуутун курдук нэһилиэнньэ бүттүүнүн долгутар кыһалҕалар быһаарыллалларыгар санааларын тиэртилэр.
Ольга Рузматова бөһүөлэккэ киириигэ автомобильнай суолга ыарахан уйуктаах тиэхиньикэ айаннааһыныгар «Платон» систиэмэтэ туран төлөбүр ирдэнэринэн кини олорор 1-кы нүөмэрдээх микро-оройуонугар уу таһар улахан массыыналар оҥорор өҥөлөрүгэр сыаналара лаппа үрдүгүн, ону атын сиргэ көһөрүү кыаллыан сөп дуо диэн ыйытта итиэннэ аһыгар таһаҕас терминалыгар өрүһүнэн кэлбит таһаҕаһы тиэммит тиэхиньикэлэр, ордук өрөбүл күннэргэ, хастыы да күн устата сүөкэммэккэ кинилэр олорор сирдэрин таһыгар турууларын утаралларын эттэ. Кини дьиэлэригэр гаас ситимэ тардыллан киирбитинэн, суоллара оҥоһуллубутунан уонна оҕото байыаннай дьайыыга сылдьар ийэ буоларынан, бөһүөлэк уонна улуус дьаһалталарыгар өйөбүллэрин, көмөлөрүн иһин махтанна.
Киирбит ыйытыыларга хоруйдар бэрилиннилэр, кэккэ туруорсуулар мунньах боротокуолугар киллэриллэн салгыы үөрэтиллэллэрэ, быһаарыы ылыныллаллара ыйылынна.
Улуууспут баһылыгын 2024 сыллааҕы үлэтин отчуота бары нэһилиэктэри хабан тэрээһиннээхтик ыытылынна. Сир ахсын нэһилиэнньэ кыттыыта көхтөөҕүн, киирэр ыйытыылар, туруорсуулар нэһилиэктэр интэриэстэрин эрэ буолбакка, улууспут сайдыытыгар, кэскилигэр сыһыаннаахтарын, этиилэр ырааҕы-киэҥи ыраҥалыыр, киэҥ ис хоһоонноохторун бэлиэтиир оруннаах.
Баһылык Дмитрий Тихонов улуус салалтатынан бары хайысхаларынан ыытыллыбыт үгүс өрүттээх үлэ-хамнас хаамыытын кэлин үс сыл көрдөрүүлэригэр тэҥнэээн сиһилии ырыппытын дьон-сэргэ сэҥээрдэ. Отчуот сыыппараларынан чахчыларга олоҕурарынан, ол барыта экраҥҥа ойууланан көрдөрүллүбүтэ судургутук, өйдөнүмтүөтүк тиэрдилиннэ.
Нэһилиэктэрбит, улууспут, өрөспүүбүлүкэбит, дойдубут инники кэскилигэр хас биирдиибит интэриэстээх. Олохпут салгыы сайдара, тупсара хас биирдиибититтэн тутулуктаах.
Алена ДОКТОРОВА.
