Бу күннэргэ Аллараа Бэстээх бөһүөлэгин айар кэлэктииптэрэ өрөспүүбүлүкэ көрүүлэригэр, куонкурустарыгар кэккэ үрдүк ситиһиилэннилэр. Хаҥалас улууһун киинигэр Покровскай куоракка олунньу ый 20 күнүгэр Улуу Кыайыы 80 сылыгар, Арассыыйаҕа Аҕа дойдуну көмүскээччи, өрөспүүбүлүкэҕэ Ийэ дойдуну көмүскээччи сылларыгар, Сомоҕолоһуу сылыгар аналлаах «Кыайыы нэһилиэнньиктэрэ» диэн аһаҕас күрэх буолан ааста.
Саха сирин араас улуустарыттан олус көхтөөхтүк кытыннылар. Бу күрэххэ Мэҥэ Хаҥалас улууһун Аллараа Бэстээх бөһүөлэгиттэн сылдьар анал байыаннай дьайыы кыттыылаахтара Сергей Прохоров, Александр Никитин, Иван Прибылых, Давид Малеев Ийэ дойдубутугар буола турар уустук кэмҥэ санааны бөҕөргөтөр, күүс эбэр амарах хоһоону ааҕаннар көрөөччүлэр уйулҕаларын долгутан, биһирэбиллэрин ылыахтарын ыллылар. Иэйиилээх ааҕыы кэнниттэн кэлбит дьон-сэргэ уйадыйан, бары туран эрэн ытыс тыаһынан байыастарга махталларын биллэрдилэр.
Биир дойдулаахтарбыт бу күрэххэ муҥутуур кыайыылаах аатын сүктүлэр.
«Кустук өҥнөөх, кымыс сыттаах сахам мандар саҥата» диэн Семен Данилов тылларынан ааттаммыт куйаар ситиминэн хоһоон ааҕыыга аһаҕас күрэс 5-с төгүлүн олунньу ый 23 күнүгэр буолан ааста.
Куонкурус тэрийээччилэринэн Хаҥалас улууһа уонна Булгунньахтаахтааҕы оҕо ускуустубатын оскуолата буолаллар. Бу да сырыыга биһиги оҕолорбут тэрээһин инники күөнүгэр буоллулар. М.Е.Попов аатынан Аллараа Бэстээхтээҕи орто оскуола үөрэнээччилэрин «Айарсан» бөлөҕө муҥутуур кыайыылаах үрдүк аатын сүктүлэр уонна харчынан бирииһинэн бэлиэтэннилэр.
Маныаха СӨ култууратын туйгунун, «Сыккыс» норуодунай кэлэктиип салайааччытын Мария Владимированы улууска уонна бөһүөлэккэ тыйаатыр сайдыытыгар элбэх үлэни ыытан тэрийэрин бэлиэтиир тоҕоостоох. Кини салалтатынан оҕолор уонна улахан дьон улууска, өрөспүүбүлүкэҕэ ыытыллар көрүүлэргэ көхтөөхтүк кытталлар уонна үгүс-элбэх ситиһиилэринэн улуус дьонун үөрдэллэр. Ол курдук бу ыйга Чурапчыга ыытыллыбыт «Алыптаах мааска» диэн норуот тыйаатырдарын өрөспүүбүлүкэтээҕи көрүүгэ Чурапчы көһүүтүгэр баран иһэр дьон Аллараа Бэстээххэ Өлүөнэ биэрэгэр эрэйи-муҥу көрүүлэрин туһунан «Ытык Аартык» испэктээги туруоран, көрдөрөн Кылаан бирииһи ылан тураллар.
