Мэҥэ Хаҥалас футболга оскуолатын иитиллээччитэ Алексей Захаров бу күннэргэ Пермь куоракка баар «Амкар» футболга идэтийбит кулууп сүүмэрдиир дьарыгар кыттан, бэйэтин көрдөрөн, кулууп иккис хамаандатыгар ыҥырылынна.
Алексей успуорт бу умсугутуулаах көрүҥүнэн 5 сааһыттан утумнаахтык дьарыктанан, араас таһымнаах күрэхтэргэ улуус, өрөспүүбүлүкэ аатын элбэхтик көмүскээн маннык ситиһиигэ кэллэ. Табаҕаҕа, Майаҕа уонна Тыыллыма орто оскуолатын иһинэн үлэлиир улуустааҕы футбол киинигэр бастыҥ үлэлээх тириэньэргэ Андрей Слепцовка дьарыктаммыта.
Дьоҕурдаах уолу таба көрөннөр, мини-футболга Саха Өрөспүүбүлүкэтин сүүмэрдэммит хамаандатын хапытаанынан талбыттара. Хамаанда Владивосток куоракка буолбут 7-с «Азия Оҕолоро» Норуоттар икки ардыларынааҕы оонньууга иккис призер буолбута. 2021-2022 уонна 2022-2023 сс. Уһук Илин Эдэрдэргэ Футболга Лигатыгар киирэн оонньуубута.
Быйыл 2024 сыл тохсунньутугар Спасск-Дальний куоракка буолбут мини-футболга бастыыр иһин күрэххэ Алексей Захаров хапытааннаах «Манчаары» кулууп Уһук Илин чөмпүйүөнүн үрдүк аатын, оттон Алексей бэйэтэ «Бастыҥ оонньооччу» анал ааты ылбыта.
Алеша успуорду, физическэй култуураны өрө туппут элбэх оҕолоох Захаровтар дьиэ кэргэн кыра оҕолоро. Эһэтэ Анатолий Константинович, аҕата Константин Анатольевич Захаровтар курдук улууска успуорт сайдыытыгар дьоһун кылааттарын киллэрбит дьон туйахтарын хатаран, улууһун, Сахатын сирин аатын ааттата сылдьар. Дьокуускайдааҕы педагогическай колледж успуорка, физическэй култуураҕа салаатын 3-с кууруһун устудьуона.
Алексей Захаров Пермь куоракка «Амкар» кулуупка ыҥырыллан, идэтийэн футболунан дьарыктаныы суолугар үктэниитэ Мэҥэ Хаҥаласка футбол сайдыытын 40 сылыгар дьоһун бэлэҕинэн буолла.
Февронья Охлопкова.
