Төҥүлү нэһилиэгин ытыктанар Мэҥэ Хаҥалас улууһун Бочуоттаах олохтооҕо, хапсаҕайга успуорт маастара, көҥүл тустууга маастарга хандьыдаат Баишев Алексей Алексеевич олорон- үлэлээн ааспыт олоҕун үйэтитэр саҥа кинигэ сүрэхтэниитэ буолан ааста.
Бу кинигэ Саха сиригэр физкултуура хамсааһынын 100 сылын чэрчитинэн тахсыбыта кэрэхсэнэр.
Ханнык баҕарар киһи дьоҥҥо-сэргэҕэ ытыктабыла кини үлэтинэн-хамнаһынан, олоҕунан-дьаһаҕынан, киһи киһиэхэ сыһыанынан сыаналанар. Оннук Алексей Алексеевич ыччаты кытары уонна нэһилиэк туһугар дууһатынан үлэлээбитэ туоһулуур. Дьиҥ сахалыы иитиилээх, толкуйдаах. Алексей Алексеевич өбүгэлэрин төрүт дойдуларыгар олохсуйан удьуорун тэнитэн кэскиллээх олоҕу олорон ааспыта. Кини олорбут олоҕун, үлэлээбит үлэтин, дьарыктаммыт дьарыгын туоһулуур элбэх наҕараадалара буолар.
Кинигэни Алексей Алексеевич кэргэнэ Зоя Ильинична үлэ бэтэрээнэ, улахан уола урбаанньыт, Саха сирин успуорка миксфайт федерациятын бэрэсидьиэнэ Николай Алексеевич иилээн-саҕалаан таһааттардылар. СӨ Үп миниистирин солбуйааччыта Николай Старостин, улуустааҕы успуорт кэмитиэтин сүрүннүүр исписэлииһэ Виталий Пестряков, нэһилиэк баһылыга Петр Эверстов кыттыыны ыллылар. Доҕотторо харбааһыҥҥа СӨ анал оскуолатын дириэктэрин солбуйааччы Юрий Баишев, «Строй Индустрия» ХЭТ генеральнай дириэктэрэ Егор Неустроев, СӨ успуорка уонна физическэй култуураҕа үтүөлээх үлэһитэ Семен Морфунов, М.Горькай аатынан сопхуоска бииргэ үлэлээбит муниципальнай сулууспа, хомсомуол бэтэрээнэ Иван Стручков, бииргэ үөрэммит үөлээннээҕэ, М.Горькай аатынан сопхуоска инженер мэхээнньигинэн үлэлээбит Григорий Шарин, оҕолорун аатыттан күтүөтэ Дьокуускай 1 №-дээх успуорт оскуолатын дириэктэрэ Иван Белолюбскай, бииргэ төрөөбүт эдьиийэ Елена Винокурова истиҥ-иһирэх ахтыылары оҥордулар.
Бары ахтан-санаан ааспыттарын курдук Алексей Алексеевич тахсыылаахтык, дьулуурдаахтык олорон ааспыта. Кини олоҕо чугас дьонугар, кэнчээри ыччаттарыгар куруутун холобур буола туруоҕа.
Елена Борисова.
Төҥүлү