Сэтинньи 10 күнүгэр үөрэтэр-оҥорон таһаарар кииҥҥэ Мэҥэ Хаҥаластааҕы суолга куттал суох буолуутун хааччыйар хамыыһыйа көҕүлээһининэн иккис төгүлүн “Мин ийэм — автоледи” күрэс ыытылынна.
Күрэскэ оҕо ийэтинээн 5 түһүмэҕинэн суолга сэрэхтээх буолууга, суол быраабылатын билиигэ тургутууну аастылар, тус дьоҕурдарын көрдөрдүлэр. Биэс ийэ оҕолорунаан Ороссолуода, Нуораҕана, Тыыллыма, В.П. Ларионов уонна Ф.Г. Охлопков аатынан Майа орто оскуолаларыттан көхтөөхтүк кытыннылар. Кинилэр онно тимир көлөлөрүн киэргэтэн билиһиннэрдилэр, автодромҥа массыына ыытан көрдөрдүлэр, суол быраабылатын, тимир көлө ис чааһын билиигэ тургутууну аастылар.
Күрэс түмүгүнэн бары түһүмэххэ үчүгэй көрдөрүүлээх, бэлэмнээх Дьабыыл орто оскуолатын 6-с кылааһын үөрэнээччитэ Айтал Тарабукин ийэтинээн Галина Гаврильевналыын кыайыылаах таҕыстылар. Иккис миэстэҕэ Ф.Г. Охлопков аатынан Майа орто оскуолатын 7-с кылааһын үөрэнээччитэ Самаана Маркова ийэтинээн Татьяна Дмитриевналыын таҕыстылар. Тыыллыма орто оскуолатын 9-с кылааһын үөрэнээччитэ Сандаара Архипова ийэтинээн Александра Васильевналыын үһүс миэстэ буоллулар.
Күрэс анал ааттара В.П. Ларионов аатынан Майа орто оскуолатын 8-с кылааһын үөрэнээччитигэр Ева Адамоваҕа, ийэтигэр Уйгулаана Николаевнаҕа уонна Ороссолуода орто оскуолатын 11-с кылааһын үөрэнээччитигэр Таня Матвееваҕа, ийэтигэр Сардана Тимофеевнаҕа иҥэрилиннилэр.
Кыайыылаахтар суолга куттал суох буолуутун хааччыйар улуустааҕы хамыыһыйа (бэрэссэдээтэл улуус баһылыгын бастакы солбуйааччы Василий Михайлов) уонна үөрэтэр-оҥорон таһаарар киин олохтообут бириистэринэн, харчылаах сэртипикээттэринэн наҕараадаланнылар. Күрэскэ көхтөөхтүк кэлэн кыттыбыт оҕолорго уонна ийэлэргэ тэрийээччилэр махталларын тиэрдэллэр.
