Бүгүн Майаҕа Улуу Кыайыы 80 сылын үбүлүөйүн тэрийиигэ уонна ыытыыга «Кыайыы» өрөспүүбүлүкэтээҕи кэмитиэтин көһө сылдьар мунньаҕа Майаҕа ыытылынна. Кэмитиэт мунньаҕын СӨ Ил Дархана Айсен Николаев салайан ыытта.
Биир бэлиэ тэрээһининэн «Кыайыы Знамятын» өрөспүүбүлүкэтээҕи эстэпиэтэтин саҕаланыыта буолла. Ил Дархан Айсен Николаев «Кыайыы Знамятын» «Мэҥэ Хаҥалас улууһа» муниципальнай оройуон баһылыгар Дмитрий Тихоновка үөрүүлээх быһыыга-майгыга туттарда.
Улуу Кыайыы үбүлүөйүн тэрээһинигэр ыытыллар үлэ-хамнас туһунан суруналыыстарга Айсен Николаев кылгастык бу курдук билиһиннэрдэ:
‒ Улуу Кыайыы үбүлүөйэ дойдубут дьонун барытын таарыйар. Аҕа дойду Улуу сэриитигэр Улуу Кыайыыга биһиги ытык өйдөбүлбүтүн ытыктыахтаахпыт, харыстыахтаахпыт итиэннэ кэлэр көлүөнэлэргэ тиэрдиэхтээхпит. Ол чэрчитинэн өрөспүүбүлүкэбитигэр тэрийэр кэмитиэппит үлэтин саҕалаабыта балайда ыраатта.
Бүгүн Мэҥэ Хаҥалас улууһугар кэлэн элбэх боппуруоһу көрдүбүт. Өрөспүүбүлүкэ үрдүнэн ыытыллыахтаах тэрээһиннэр былааннара бигэргэтиллэн үлэ саҕаланан тэтимнээхтик барар. Бүгүн кэмитиэт көһө сылдьар мунньаҕар Мэҥэ Хаҥалас улууһугар ыытыллар үлэни-хамнаһы билистибит. Улуус баһылыга Дмитрий Тихонов сиһилии кэпсээтэ. Мин улуус ыытар үлэтин хайҕаатым. Кэнники икки сылга улахан үлэ ыытыллан улуустан Аҕа дойду Улуу сэриитигэр кыттыбыт дьон испииһэктэрин өссө чуолкайдаан, чөлүгэр түһэрэн, архыыптары, бибилэтиэкэлэри кытары бииргэ үлэлэһэннэр, бу иннинэ ханна да киллэриллибэккэ, биллибэккэ сылдьыбыт 307 буойун аатын буланнар, өйдөбүнньүк кинигэҕэ киллэрбиттэр. Маннык үлэни атын да улуустарга эмиэ ыытыахха наада. Мин бэйэм куорат баһылыгынан үлэлии олороммун, Туймаада хочотуттан сэриигэ барбыт дьон ааттарын чуолкайдаһан, сөргүтэммит хас да тыһыынча киһини саҥаттан буламмыт «Туймаада саллаатын» мемориалыгар киллэрэн турардаахпыт. Ити курдук үлэ салгыы барыахтаах.
Үлэбит биир улахан хайысхатынан оскуолаҕа үөрэнэр оҕолорбутугар, ыччат дьоммутугар патриотизм тыынын иҥэрэр сыаллаах Аҕа дойду Улуу сэриитигэр Улуу Кыайыы суолтатын туһунан үчүгэйдик кэпсээн, биир дойдулаахтара, аймах-билэ дьонноро хайдах сэриилэспиттэрин устуоруйаны үөрэтэн өрөспүүбүлүкэ тас өртүгэр эрэ буолбакка, өрөспүүбүлүкэбит иһигэр баар мусуойдарга сылдьан билэллэрин-көрөллөрүн ситиһэр сорук туруоруллар. Мэҥэ Хаҥалас улууһун холобуругар этэр буоллахха, сахалартан бастакы Сэбиэскэй Сойуус Дьоруойа Федор Кузьмич Попов төрөөбүт сиригэр Сыымахха баар мусуойу мемориальнай комплекс курдук оҥорон онно өрөспүүбүлүкэ дьоно-сэргэтэ, чуолаан оскуола оҕолоро эмиэ сылдьалларыгар үлэ тэриллиэхтээх. Эһиил Улуу Кыайыы Кыайыы 80 сылын бэлиэтиир үөрүүлээх дьоро күммүтүгэр, ыам ыйын 9 күнүгэр, биир бэлиэ тэрээһиммитинэн Дьокуускай куоракка Федор Поповка пааматынньык арыйыахпыт. Онно үлэ хаамыытын туһунан бүгүҥҥү мунньахха Дьокуускай куорат баһылыга Евгений Григорьев иһитиннэрдэ.
Алена ДОКТОРОВА.