Дьокуускай куоракка олунньу 22 күнүгэр мэлэдьиистэр өрөспүүбүлүкэтээҕи түмсүүлэрин төрүттээбит, өр сыл ситиһиилээхтик салайан үлэлэппит Анатолий Николаевич Семенов аатынан сыллата ыытыллар «Поющее мужское братство» куонкурус тэрилиннэ.
Ырыаһыт эр дьон быйылгы түмсүүтэ Улуу Кыайыы 80 сылыгар, дойдуга Аҕа дойдуну көмүскээччи, Саха сиригэр Ийэ дойдуну көмүскээччи сылларыгар ананна.
Өрөспүүбүлүкэ култуурунай олоҕун биир дьоһун түһүлгэтин муҥутуур кыайыылааҕынан Мэҥэ Хаҥалас Майатыттан «Аарык» ансаамбыл буолла. Уолаттар бу үрдүк ааты Иван Арбита тылларыгар, Уля Сергучева – Күннэй мелодиятыгар «Сааскы күҥҥэ» ырыаны толорон ыллылар.
«Аарыктары» – Константин Скрябины, Иннокентий Петухову, Станислав Стручкову, Александр Кулешову, салайааччыларын СӨ култууратын үтүөлээх үлэһитин Георгий Георгиевич Сергучеву үрдүк ситиһиилэринэн эҕэрдэлиибит!
Куонкурус 2-с истиэпэннээх дипломанын аатын Хара нэһилиэгиттэн Татьяна Степанова салайааччылаах, Леонид Винокуров концертмейстердаах «Уолан» вокальнай кэлэктиип ылла.
