Мин, Төҥүлү олохтооҕо, үлэ бэтэрээнэ Александра Лыткина, М.Горькай аатынан сопхуос киин отделениетыгар өр сыл ыанньыксытынан үлэлээбитим. Муҥутуур ситиһиибинэн 1988 сыллаахха биирдии ынахтан 3500 кг үүтү ыабытым буолар. Кыһынын Сэгэлэй пиэрмэҕэ, сайынын Күөрчэх Тиит сайылыкка үлэлээбитим. Үлэбэр кыһамньылаахтык уонна бэриниилээхтик сыһыаннаһарым, хотоҥҥо чэбэрдик туттарбын сөбүлүүрүм, үүтүм хаһан баҕарар ыраас буолара, хаһан да иккис сортка барбатаҕа, үүтүм былаанын мэлдьи аһара толорорум.
Хомойуох иһин, олохпут тутула уларыйан, сопхуостар эстэннэр, үлэлии түһүөх дьон эрдэ үлэтэ суох буола түспүппүт. Бу кэмҥэ биһиги кэргэним Филипп Афанасьевичтыын элбэх оҕолоох ыал буоламмыт, кэтэх хаһаайыстыба тэринэн, бэйэбит сүөһүбүтүн-аспытын көрбүппүт. Оччоттон оройуоммут хаһыатын сурутан ааҕар этибит. Кэлиҥҥи сылларга аҥаардас биэнсийэҕэ олорор буоламмын ардыгар хаһыаппын сурутарым ыарахаттардаах буолбута.
Ил Түмэн дьокутаата Андрей Находкин улууһун хаһыатыгар хаһыс да сылын успуонсардаан, тыа хаһаайыстыбатыгар үлэлээн бочуоттаах сынньалаҥҥа олорор 10 үлэ бэтэрээнигэр сурутуу бэлэх уунар диэн, миэхэ «эркээйилэр» хаһыаппын ыыталлар. Маннык болҕомтолоох салайааччылардаахпыт, дьокутааттардаахпыт биһиги олохпутун сэргэхситэллэр.
Онон бу тапталлаах улууһум хаһыатын ааҕа олорорбор Андрей Михайловичка барҕа махталбын тиэрдэбин. Кини үрдүк эппиэтинэстээх үлэтигэр ситиһиилэри, тус бэйэтигэр чиргэл доруобуйаны, дьиэ кэргэнигэр уйгулаах олоҕу баҕарабын.
Александра Лыткина,
Төҥүлү олохтооҕо, үлэ бэтэрээнэ.