Бүгүн, от ыйын 30 күнүгэр, биэнсийэлээхтэр өрөспүүбүлүкэтээҕи 3-с ыспартакыйаадаларыгар Мэҥэ Хаҥалас улууһун хамаандатын сүүмэрдиир күрэхтэһии ыытылынна.
Ыспартакыйаада Майа сэлиэнньэтигэр «Манчаары» чэбдигирдэр кииҥҥэ, стадиоҥҥа тэрилиннэ.
Күрэхтэһиигэ бочуоттаах сынньалаҥҥа олорор, чөл олох, успуорт эйгэтин талбыт аҕа саастаах дьон 1-кы Тыыллыма, Төҥүлү, Нөөрүктээйи, 1-кы, 2-с Наахара, Хорообут, Ходоро, Араҥас, Ороссолуода, Хара нэһилиэктэриттэн, Аллараа Бэстээхтэн уонна Майа сэлиэнньэтиттэн кытта кэлбиттэр.
Спортсменнар саахымакка, буулдьанан ытыыга, остуол тиэнниһигэр, сүүрүүгэ, дартска бэйэлэрин кыахтарын холонон көрдүлэр.
Тэрээһин түмүгүнэн 1000 миэтэрэҕэ сүүрүүгэ бастакы миэстэни Лилия Петрова, Эдуард Петров (Нөөрүктээйи) ыллылар, иккис – Яна Лыткина (Төҥүлү), Давид Торговкин (Нөөрүктээйи), үһүс – Дарья Попова (Хара), Николай Назаров (Төҥүлү) буоллулар.
Буулдьанан ытыыга Альбина Шарина (Төҥүлү), Анатолий Борисов (Төҥүлү) – бастаатылар, Мария Сидорова (Хара), Гаврил Цыпандин (Төҥүлү) – иккис уонна үһүс – Анна Старостина (Нөөрүктээйи), Дмитрий Колосов (Майа) миэстэни ыллылар.
Дартска бастаатылар – Людмила Кычкина (Нөөрүктээйи), Николай Степанов (Майа), иккис миэстэҕэ – Галина Громова (Төҥүлү), Николай Яковлев (Аллараа Бэстээх), үһүскэ – Анна Старостина (Майа), Анатолий Борисов (Төҥүлү) тигистилэр.
Остуол тиэнниһигэр Антонина Федорова (1-кы Наахара), Еремей Куприянов (Майа) кыайыылаах таҕыстылар, Анна Харитонова (Төҥүлү), Андрей Цыпандин (Араҥас) – иккис, Светлана Пинигина (1-кы Тыыллыма), Виталий Аммосов (Ороссолуода) – үһүс түмүктэннилэр.
Саахымакка Раиса Петрова , Павел Цыпандин (майалар) инники күөҥҥэ таҕыстылар, Ульяна Шишигина (Майа), Дмитрий Сыромятников — Кэрэһиннээх иккис, Мария Попова, Николай Климентов (майалар) үһүс миэстэҕэ таҕыстылар.
Бастыҥ көрдөрүүлээх спорсменнарбытыгар салгыы өрөспүүбүлүкэтээҕи ыспартакыйаадаҕа үрдүк ситиһиилэри баҕарабыт.
Иван Лукин.
