«Россия – моя история» кииҥҥэ олунньу 8 күнүгэр «Туймаада волонтёрдара» хамсааһын иһинэн өрөспүүбүлүкэ уһуйааннара «Туллук – символ мира и добра» аахсыйа ыытылынна. Дьокуускай куорат уһуйааннарын иитиллээччилэрэ, төрөппүттэрэ, өрөспүүбүлүкэ улуустарыттан иитээччилэр кытыннылар.
Бырайыак сүрүн сыала: хамсааҺыҥҥа дьиэ кэргэни түмэ тардыы, оҕоҕо кыра сааҺыттан төрөөбүт дойдутугар тапталы иҥэрии, дойду туҺугар бэриниилээх буолууга иитии буолар. Билиҥҥи туругунан өрөспүүбүлүкэбит 40 уҺуйаана бырайыакка бииргэ үлэлэһэргэ кыттыспыт.
Ыҥырыылаах ыалдьыттарынан Норуодунай фронтан, Дьахталлар өрөспүүбүлүкэтээҕи лигаларыттан, ыччат политикатыгар министэристибэтиттэн, СВО кыттыылааҕа уолаттар махтал тылларын эттилэр, алгыстарын анаатылар уонна Кыайыы биһиги туспутугар буоларыгар эрэллэрин биллэрдилэр.
Бу сонун тэрээһиҥҥэ Майатааҕы «Кэнчээри» оҕону сайыннарар киин иитиллээччилэрэ, төрөппүттэрэ, үлэһиттэрэ көхтөөх кыттыыны ыллылар. Ол курдук, оҕолорбут төрөппүттэрин кытта илии сылааһын иҥэрэн тикпит сымнаҕас туллук харысхалларын, бөлөхтөрүгэр сылдьан уруһуйдаабыт баҕа санаалаах эҕэрдэ уруһуйдарын, ону тэҥэ уһуйаан үлэһиттэрэ буһаран хатарбыт «собо миинэ» хомуллан туттарылынна. Манна мустубут уһуйааннар презентацияларын экраҥҥа көрдөрөн, аахсыйаҕа туох үлэ ыытыллыбытын сырдаттылар.
Иитээччилэрбит Феврония Дьяконова, Сардана Лонгинова уҺуйааммыт патриотическай хайысхаҕа туһуланар иитэр-үөрэтэр үлэтин баай уопутун өрөспүүбүлүкэ таһымыгар билиһиннэрдилэр.
Куорат уһуйааннарын оҕолоро кэнсиэр нүөмэрдэрин туруорбуттарын ытыс дохсун тыаһынан доҕуһуоллаатыбыт.
Күн иккис аҥарыгар: араас хабааннаах маастар кылаастар, оҕолор быыстапкалара, эҕэрдэ нүөмэрдэрэ, сиэккэни өрүү, атыы-тутуу дьаарбаҥката, сүүйүүлээх бириистээх оонньуулар мустубут дьону интэриһиргэттилэр. Манна киирбит үп барыта волонтёрдар пуондаларыгар киирэн, Аҕа дойдуларын көмүскүү сылдьар уолаттарга барыаҕа. Онон байыаннай дьайыы бара турар сиригэр ыытарга анаан хомуллубут таҥаһы, туттар тэрили, оҥорбут туллуктарбытын «Якутия с тобой» кииҥҥэ туттардыбыт. «Биир дойдулаахтарбыт КЫАЙЫЫ көтөллөөх, ЭЙЭ кынаттаах төрөөбүт сирдэригэр этэҥҥэ эргиллэн кэллиннэр!» диэн алгыспытын ыыттыбыт.
«Волонтёры Саха Дети» хамсааһын саҕаланыаҕыттан ордук күүскэ үлэлэспит уһуйааннарга «Волонтёры Саха» уопсастыбаннай хамсааһын аатыттан Махтал суруктары уонна Чебурашка оонньууру бэлэх туттардылар. Бу күн Сахабыт сирин үрдүнэн “туллукчааннар” үтүө санаанан үөрдүһэн, тулуур, дьулуур бэлиэлэрэ, күүстээх санаа мэктиэлэрэ сырдыгынан сайаннар көтө дайдылар.
Сонуну бэлэмнээтилэр: уһуйаан мэтэдьииһэ Мария Лепчикова, иитээччи Сардана Аввакумова.
