Сэтинньи 21 күнүгэр Доллу нэһилиэгэр СӨ култууратын үтүөлээх үлэһитэ Арассыыйа норуотун үөрэҕириитин туйгуна, 20-с үйэ СӨ успуордун лауреата, тыыл, үлэ, Арассыыйа успуордун бэтэрээнэ Семен Никифорович Эверстов 95 сааһыгар аналлаах 2011-2012, 2013-2014, 2015 сс. уолаттарга көҥүл тустууга өрөспүүбүлүкэтээҕи аһаҕас турнир буолла.
Семен Никифорович 1929 с. балаҕан ыйын 27 күнүгэр Доллу нэһилиэгэр Никииппэр Махсыымабыс уонна Мааппа Павловна Эверстовтар дьиэ кэргэттэригэр бастакы оҕонон төрөөбүт. Төрөппүттэрэ эрдэ өлөн аҕатын эдьиийигэр Власова Анна Михайловнаҕа иитиллибит. 1945 сыллаахха Төҥүлү 7 кылаастаах оскуолатын бүтэрэн Дьокуускай куорат 2 №-дээх оскуолатыгар киирбит. Иллэҥ кэмигэр оҕо спортивнай оскуолатыгар дьарыктанара. Ордук гимнастиканан сөбүлээн дьарыктанара. Кинини кытары тэҥҥэ Тарас Десяткин, Ксенофонт Пшенников дьарыктанаммыттара. 1949 с. Москваҕа И.В.Сталин аатынан Киин физкултуура институтугар туттарсан киирэр. Үөрэҕин бүтэрэн кэлэн Дьокуускайдааҕы педагогическай институт физическэй кафедратын ассистенынан үлэтин саҕлаабыт. Эһиилигэр эдэр үлэһит кафедра сэбиэдиссэйинэн анаммыт. Бу салайар үлэҕэ 20 сыл физическай хамсааһын сайдарыгар бэриниилээхтик, үлэлээбитэ.1957 с. студенческай стадиону тутуу, 1977 с. эдэр ыччат уонна оҕо спортивнай оскуолатын (ДЮСШ) дириэктэрин үлэлиир кэмигэр өрөспүүбүлүкэҕэ гимнастика көрүҥэ күүскэ сайдыбыта.
Күрэхтэһиигэ уопсайа18 хамаанда Үөһээ Бүлүү, Таатта, Хаҥалас Амма, Уус Алдан, Мэҥэ Хаҥалас улуустарыттан, Дьокуускай куорат 5, 3 оҕо успуорун, 25 №-дээх уопсай үөрэхтээһин оскуолаларыттан 195 эдэр кэскиллээх ыччат бөҕөстөр кытыннылар.
2011-2012 с.т. уолаттар 35, 44, 52, 2013-2014 с.т. уолаттар 28, 30, 32, 35, 38, 46, 2015 с.т. уолаттар 22, 24, 26, 28 ,32 кг ыйааһыннарга күөн көрүстүлэр.
Бөҕөстөрү эҕэрдэлээн Доллу нэһилиэгэ тыа сирин түөлбэтин баһылыга Николай Сивцев, Семен Никифорович сиэн быраата Дмитрий Титов, улуус көҥүл тустууга ыстаарсай тириэньэрэ, аан дойду кылаастаах успуорт маастара Александр Птицын тыл эттилэр.
Күрэхтэһии түмүгүнэн кыайыылаахтарга өйдөбүнньүк мэтээллэри, грамоталары, бириистэри, ону таһынан “Бастыҥ бөҕөс», «Бастыҥ хапсыһыы», «Бастыҥ техника», «Кыайыыга дьулуур”, “Бастыҥ киирсии” анал ааттары туттардылар.
Тумул орто оскуолатын “Куорсун» медиа бөлөҕө.
