Улууспутугар 68-с төгүлүн ыытыллар В.К.Степанов аатынан Култуура уонна спорт эстэпиэтэтэ олунньу 15 күнүттэн саҕаланна.
Быйылгы эстэпиэтэ «Түмсүөҕүҥ, сомоҕолоһуоҕуҥ-эйэлээх олоҕу тутуоҕуҥ!» диэн дэбиистээх ыытыллыаҕа. Баһылай Манчаары төрөөбүтэ 220, Мэҥэ Хаҥалас улууһа төрүттэммитэ 95 уонна Улуу Кыайыы 80 сылыгар ананыаҕа.
Бэлиэ күн улуус баһылыга Дмитрий Тихонов тэрийэр хамыыһыйаҕа эстэпиэтэ былаахтарын үөрүүлээх быһыыга туттарда. Норуоту түмэр, көлүөнэни ситимниир үтүө түһүлгэҕэ саҥа ааттар, чаҕылхай талааннар, бастыҥтан бастыҥнар күөрэйдиннэр диэн баҕа санаатын эттэ. Талба талааннаах, успуорду өрө тутар, дьону-сэргэни кэрэҕэ угуйар үтүө дьоммутугар, дьүүллүүр сүбэҕэ ситиһиилэри баҕарда.
Култуура салалтатын салайааччыта Анна Исакова дьүүллүүр сүбэни билиһиннэрдэ. Улууспут биир сүрүн хамсааһына, дьону-сэргэни түмэр, сүргэтин көтөҕөр, киэн туттар тэрээһиммит саҕаламмыт күнүнэн эҕэрдэтин тиэртэ. Бүгүҥҥү күҥҥэ эстэпиэтэ өрөгөй ырыатын Төҥүлүлэр — Тараҕайга, Дьабыыллар — Баатараҕа уонна Ороссолуодалар — Моорукка тиийэн дуоратыахтара.
Үтүө түһүлгэҕэ барыгытыгар ситиһиини, кыайыыны-хотууну, кэрэ түгэннэри баҕарабыт. Ким ордук бэлэмнээх — ол кыайдын!
Мэҥэ Хаҥалас улууһун дьаһалтатын пресс-сулууспата.
