«Түмсүөҕүҥ, сомоҕолоһуоҕуҥ – эйэлээх олоҕу тутуоҕуҥ!» диэн девизтээх Майа сэлиэнньэтигэр 2025 сылга ыытыллар үгэс буолбут култуура уонна успуорт эстэпиэтэтэ Манчаары төрөөбүтэ 220, Мэҥэ Хаҥалас улууһа төрүттэммитэ 95, Улуу Кыайыы 80 уонна Майа сэлиэнньэтигэр Төрүччү сылларыгар ананна. Олунньу 9 күнүгэр «Кыталык» улуустааҕы уопсастыбаннай кииҥҥэ «Эр дьон оһуокайа» күрэх ыытылынна. Оһуокайга Майа тэрилтэлэриттэн барыта 5 бөлөҕүнэн 135 эр дьон кытыннылар.
Оһуокай түһүлгэтэ Майа сэлиэнньэтин баһылыга Алексей Неустроев эҕэрдэ тылынан, Түсчүт Зиновий арчытынан, сомоҕолоһуу оһуокайынан саҕаланна. Дьүүллүүр сүбэҕэ үлэлии кэлбит дьоммут: Саха сирин чулуу кыната Александр Барчахов-Алаас Уолана, Саха сирин үтүөлээх этээччилэрэ Петр Григорьев, Данил Пестряков, Саха сирин Дархан этээччитэ, Саха сирин Дархан этээччилэрин сүбэтин салайааччыта Валентин Хорунов-Дьэргэлгэн, Саха сирин Дархан этээччитэ, Саха Өрөспүүбүлүкэтин култууратын үтүөлээх үлэһитэ, дьүүллүүр сүбэ бэрэссэдээтэлэ Дмитрий Иванов астынан туран сомоҕолоһуу оһуокайын таһаардылар.
Тэрээһин түмүгүнэн кыайыыны Ф.Г.Охлопков аатынан оскуола бөлөҕө ситистэ. 2-с миэстэни – В.П.Ларионов аатынан оскуола бөлөҕө, 3-с миэстэни – «Кэнчээри» уһуйаан бөлөҕө, 4-с миэстэни – И.Г.Тимофеев аатынан лиссиэй бөлөҕө, 5-с миэстэни – улуустааҕы киин балыыһа бөлөҕө ыллылар. Бастыҥ оһуокай этээччилэринэн Антон Баишев (В.П.Ларионов аатынан Майатааҕы орто оскуола бөлөҕө), Михаил Масаха («Кэнчээри» уһуйаан бөлөҕө) уонна Захар Моякунов (улуустааҕы киин балыыһа бөлөҕө) ааттаннылар.
Дьүүллүүр сүбэ олус болҕойон, тэҥҥэ хаамсан бары этээччилэри, бөлөхтөрү сыаналаата, эдэр дьон элбэҕиттэн үөрэн туран «тэҥ баайыылаахтар эбит» диэн санаатын үллэһиннэ, «бииргэ үлэлэһиэхпит, өссө да сайдан иһиҥ» диэн баҕа санааларын тиэртилэр.
Баһылык Алексей Иннокентьевич: «Быйылгы күрэхпитигэр күүс-көмө, өйөбүл буолбут дьоммутугар — Саха сирин Оһуокай түмсүүтүн бэрэссэдээтэлигэр Александр Даниловка — Дьулуур Хаанҥа, Олоҥхо тыйаатырын салайааччытыгар Зинаида Борисоваҕа, Мэҥэ Хаҥалас улууһун социальнай бэлиитикэҕэ управлениетын салайааччытыгар Октябрина Кулешоваҕа итиэннэ бары кыттааччыларга, бөлөхтөрү бэлэмнээбит дьоммутугар, салайааччыларга барҕа махталбытын биллэрэбит», — диэтэ.
Иван Лукин.
