Ахсынньы 24 күнүгэр улуус баһылыгын Дмитрий Тихонов 2024 сыллааҕы үлэтин отчуота 2-с Тыыллыма нэһилиэгэр туруорулунна.
Отчуоттуур бөлөххө Ил Түмэн дьокутааттара Олег Марков, Тихон Скрябин, улуус управлениеларын уонна тэрилтэлэрин салайааччылара, солбуйааччылара, исписэлиистэрэ уонна маны тэҥэ оройуон Сэбиэтин дьокутаата Михаил Масаха кыттыыны ыллылар.
Элбэх хайысхалаах култуура киинигэр 22 олохтоох муһунна. Дмитрий Иванович 2024 сыл устата Мэҥэ Хаҥаласка ыытыллыбыт үлэ бары хайысхаларын сиһилии кэпсээбитин кэннэ нэһилиэк баһылыга Айсен Спиридонов дьонун-сэргэтин көхтөөх кэпсэтиигэ ыҥырда. Олохтоохтор нэһилиэккэ биэлсэр быраас наадатын, үлэһиттэргэ аналлаах уопсай дьиэни өрөмүөннүүр үлэни салгыы тэрийэргэ улуустан көмө, саҥа таас уопсай дьиэҕэ интэриниэт хаабыла тардыыта, билиҥҥи олох ирдэбилинэн күүстээх төлөпүөн сибээһэ, нэһилиэктэр икки ардыларын суолларыгар тупсарар үлэ наадатын эттилэр. Салгыы саҥа оскуола тутуутун, нэһилиэккэ гаас ситимэ кэлиитин, «Земскэй доктор» бырагыраама, саҥа хотон туттарга туох көмө баарын, Аллараа Бэстээххэ элбэх оҕолоох дьоҥҥо бэриллибит учаастакка туох үлэтэ бара турарын туһунан ыйыталастылар.
Олег Марков улуустан талыллан Ил Түмэҥҥэ үлэлии сылдьар дьокутааттар үлэлэрин сырдатта. Тихон Скрябин тыа хаһаайыстыбатын саҥа сокуоннарын билиһиннэрдэ. Кэтэх хаһаайыстыбаны өрө көтөҕөргө Михаил Масаха бэйэтин холобурунан сиһилии кэпсээтэ.
2-Тыыллыма нэһилиэгин олохтоохторо байыаннай дьайыыга сылдьар дьоҥҥо күүс-көмө буолалларыгар Дмитрий Тихонов махтал тыллары эттэ.
Иван Лукин.
