Ахсынньы 11 күнүгэр улуус баһылыга Дмитрий Тихонов 2024 сыллааҕы үлэтин отчуота Тиэлиги олохтоохторугар туруорулунна.
2024 сыл түмүгүнэн улуус үрдүнэн бары хайысхалар үлэлэрин сырдатыы күнүгэр нэһилиэк баһылыга Иннокентий Исаков, СӨ Ил Түмэн Судаарыстыбаннай Мунньах сир сыһыаннаһыыларыгар, айылҕа ресурсаларыгар уонна экологияҕа кэмитиэтин бэрэссэдээтэлэ Андрей Находкин, улуус дьокутааттарын сэбиэтин бэрэссэдээтэлэ Иннокентий Андросов, управлениелар, тэрилтэлэр салайааччылара, солбуйааччылары, исписэлиистэрэ маны тэҥэ улуус дьокутаата Михаил Масаха кыттыыны ыллылар.
Быйылгы отчуотун Дмитрий Иванович нэһилиэк олохтоохторугар сырдатта уонна байыаннай дьайыыга сылдьар дьоммутугар күүс-көмө буолалларыгар махтал тылларын эттэ. Отчуоту 59 киһи иһиттэ. Дьон-сэргэ чааһынай, нэһилиэк, улуус олоҕор сыһыаннаах ыйытыылары биэрдилэр, этиилэри киллэрдилэр. Бастатан туран өр сыллаах кыһалҕаларынан саҥа успуорт саалатын тутуллуута буолла. Нэһилиэктэр икки ардыларынааҕы суолу өрөмүөннүүр үлэ ыытыллара наадатын санаттылар. Нэһилиэктэн Дьокуускайга барар автобус, Аллараа Бэстээххэ элбэх оҕолоохторго бэриллибит уһаайбаларга суол уонна электроуот тардыллара наадатын эттилэр. Көҥүл сылдьар ыттарга туох дьаһал баарын, үүт сыаната хаһан үрдүүрүн, быраастар мобильнай быраастар биригээдэлэрин үлэлэрин, дьиэҕэ сылаас ситими холбуурга ханнык көмө баарын ыйыталастылар.
Ил Түмэн дьокутаата Андрей Находкин «КлиКра сокуонун» туһунан дьоҥҥо-сэргэҕэ быһаарда. Олохтоохтор улуус баһылыга түргэн, күүстээх интэриниэт сибээһэ холбонор куонкуруһугар күүс-көмө буолбутугар махтаннылар. Сыл устата улууска ыытыллыбыт үлэлэри үрдүктүк сыаналаатылар.
Иван Лукин.
