Эһигини барыгытын улууспут олохтоохторун, салалтатын, дьокутааттарын Сэбиэтин ааттарыттан идэлээх бырааһынньыккытынан – Учуутал күнүнэн ис сүрэхпиттэн эҕэрдэлиибин! Кэнчээри ыччаппыт үөрэхтээх, киэҥ билиилээх-көрүүлээх үтүө дьон буолан үүнэн тахсалларыгар күннэтэ ыытар сыралаах үлэҕит иһин сүһүөхтээх бэйэм сүгүрүйэн туран махталбын тиэрдэбин.
Быйыл Арассыыйа Бэрэсидьиэнэ Владимир Путин биллэрбит, Дойдубут үрдүнэн Уһуйааччы уонна Аҕа сүбэһит бэлиэ сылыгар Учуутал күнэ ураты суолталанар. Бу күн хас биирдии сиппит-хоппут киһиэхэ үөрэҕи-билиини биэрбит учууталларын ааттара үтүө өйдөбүнньүгү үөскэтэр, кэрэ кэм кэрэһитэ буолар.
Үөрэх салаата инники кэскили түстүүр, сарсыҥҥы күҥҥэ туһаайыллар эйгэ.
Бүгүн Саха сирин үөрэҕин тиһигэ биир бөдөҥ эйгэнэн буолар. Үөрэҕирии бастыҥ үгэстэрин биһиги улууспутугар биэс сүүстэн тахса педагог салгыыр. Билигин үөрэх эйгэтин үлэһиттэрин иннигэр хаачыстыбаны үрдэтиигэ, оҕо идэтин таба талыытыгар, үөрэнээччи инникитин үлэни өрө тутар дьоһун киһи буолан тахсарыгар сөптөөх үлэни тэрийэргэ улахан соруктар тураллар.
Ытыктабыллаах учууталларбыт, үөрэх эйгэтин бары үлэһиттэрэ! Улууспутугар, өрөспүүбүлүкэбитигэр үөрэҕирии эйгэтэ үүнэ-сайда турарыгар, хас биирдии оҕо уонна ыччат бастыҥ үөрэҕи ыларыгар бары биир буолан үрдүк көрдөрүүлээх үлэни ыытары ситиһиэҕиҥ. Ол туһугар, өр сылларга үлэлээбит ытыктабыллаах бэтэрээннэрбит баай уопуккутугар тирэҕирэн, эдэр учууталларбыт иннигэр турар соруктары тобуларга үүннээх-тэһииннээх үтүө тылгытын иһитиннэрэ, сүбэ-ама буола туруоххут диэн эрэнэбин.
Айымньылаах үлэҕитигэр үгүс ситиһиини, кыһамньылаах, билиигэ тардыһыылаах үөрэнээччилэри, тус бэйэҕитигэр уонна чугас дьоҥҥутугар чэгиэн доруобуйаны, этэҥҥэ буолууну, саҥа кирбиилэри, дьолу-соргуну, баҕа санаа бастыҥын, үтүө санаа үтүмэнин баҕарабын!
Дмитрий Тихонов, улуус баһылыга.
