Сыанаҕа үҥкүүлүү сылдьар дьон ортотугар ураты кэрэ хамсаныылаах дьон баар буолар. Киһи хараҕа кинилэртэн арахпат буолааччы.
Бу сайын Майа ыһыаҕар биир оннук кыра кыысчааны таба көрөн видеоҕа устубутум. Этэрбэһэ улахан буолан уһуллан түһээри да гыннар, кыра кыыс ону биллэрбэккэ олус эрчимнээхтик, ис киирбэхтик туттан-хаптан, үҥкүүтүн толору үҥкүүлээтэ. Тырыбынаҕа олорор дьон бары да, арааһа, бу кыысчааны бэлиэтии көрбүттэрэ буолуо.
Бу кыысчаан оҕо сааспын санатта. Оскуолаҕа эмиэ үҥкүү куруһуогар хабыллан турабын. Ийэбэр көмөлөһөн киэһээ оскуола муостатын сууйа сырыттахпына, оскуолам дириэктэрэ ыҥыран ылан, илиибиттэн сиэтэн, саалаҕа үҥкүү куруһуогар кэлбит оҕолорго уган кэбиспитэ. Уонна салайааччыга миигин булгуччу дьарыктыырыгар эппитэ.
Онон дириэктэр уола буолан хаалбыт түгэннээхпин. Бука, куруук оскуолаҕа муоста сууйсарбын көрөн аһыммыта буолуо… Ийэм да хааччахтаһа сатаабатаҕа. Онтон ыла бэрт элбэхтэ кэнсиэргэ кыттан, оргуйар олох үөһүгэр киирбитим. Элбэх доҕоттордоммутум.
Миэхэ Лиза диэн кыыһы баараҕа биэрбиттэрэ. 5-с кылаас уола кавалер оруолун толорорбор тиийбитим. Лиза олус үҥкүүһүт, кыраһыабай кыыс этэ. Эмиэ бу кыыс курдук ис- иһиттэн сырдаан үҥкүүлүүрэ. Ону мин куруук бэлиэтии көрөр буоларым.
Онтон улахан кылааска аны Еля диэн кыыс баара буолбута. Еля эмиэ олус үҥкүүһүтэ, түү курдук чэпчэкитэ. Сорох үҥкүүгэ кыыһы кыратык көтөҕөн да ылар түгэн көстөрө, онно олох ыйааһына биллибэт этэ. Олус сөҕөрүм. Бэйэтин кыанар кыыс ыйааһынын биллэрбэт буолар эбит. Кэлин үҥкүүһүт, үҥкүү туруорааччы буолбута. Араас үчүгэй үҥкүүнү «Көлүкэчээн» амсаамбылга туруорбута.
Онон оҕо сылдьан икки олус үҥкүүһүт кыргыттары кытта үҥкүүлээн турабын.
Саас ортобор сылдьан биир сыбаайбаҕа балеринаны кытта вальстаан турабын. Эмиэ да сиһиттэн хаайа, салайа тутар курдукпун да, балеринам эмиэ түү курдук, салгыны кууспут курдук буолаҕын. Оннук чэпчэкитик үҥкүүлүүр эбиттэр үҥкүүһүт кыргыттар.
Оттон үҥкүүһүтэ суохтары кытта вальстаатахха, «тааҥканы» эргитэ сылдьар курдук буолаҕын. Сыраҥ-сылбаҥ баранар, илииҥ сылайар…
Федот Харитонов.