Бүгүн, олунньу 9 күнүгэр, Майаҕа промкомбинат устуоруйатын сырдатар кинигэ сүрэхтэниитэ тэрилиннэ.
«Мэҥэ Хаҥаластааҕы промкомбинат» кинигэ Новосибирскайга «Деал» кинигэ кыһатыгар бэчээттэннэ. Хомуйан оҥорууга Валентина Васильева, Николай Тарасов, техническэй эрэдээктэринэн Марфа Птицына үлэлэстилэр. Кинигэни таһаарыыга промкомбинат үлэтин салҕааччы Үөрэтэр-оҥорон таһаарар киин кэлэктиибэ көҕүлээтэ, үбүлээн таһаартарда.
Промкомбинат 1940 сылтан ситэн-хотон таһаарыылаахтык үлэлээбит тэрилтэҕэ хас эмэ сүүһүнэн киһи үлэлээн ааспыта, үлэһит дьиэ кэргэн династиялара үөскээбитэ. Кинигэҕэ дьиэ кэргэттэр дьоннорун-сэргэлэрин ахтыылара, үгүс хаартыскалар киллэрилиннилэр.
Сүрүн болҕомтону оччотооҕу «Колхоз кырдьыга», «Ленинскэй знамя», билиҥҥи «Эркээйи» хаһыаттарга промкомбинат үлэтин сырдатар суруйуулар ылаллар. Устуоруйа кэрэһиттэрэ буолбут саһарбыт хаартыскаларга бары көлүөнэ үлэһиттэр бааллара үгүстэри долгутта.
Кинигэ сүрэхтэниитигэр үлэлээбит кырдьаҕастар, кинилэр оҕолоро, сиэннэрэ кыттыыны ыллылар. Ил Түмэн дьокутаата Андрей Находкин, Дьокуускайтан Георгий Артемьев, оройуон баһылыга Дмитрий Тихонов, Майа сэлиэнньэтин баһылыга Алексей Неустроев о.д.а. эҕэрдэлээтилэр.
