Бүгүн, тохсунньу 19 күнүгэр, Майа сэлиэнньэтин олохтоох дьаһалтатыгар биир үөрүүлээх уонна долгутуулаах тэрээһин буолла.
2023 сылга Майа сэлиэнньэтин бэтэрээннэрин сэбиэтин былааныгар олоҕуран өрөспүүбүлүкэҕэ Үлэ уонна улууска Тыа хаһаайыстыбатын сылларынан “Бэтэрээн тиэргэнэ” диэн куонкурус ыытыллыбыта. Манна кэтэх хаһаайыстыбатыгар ынах сүөһү, түргэнник ситэр дьиэ кыылларын иитиинэн, оҕуруот аһын олордуунан, отонноох мас арааһын, сибэкки эгэлгэтин үүннэриинэн ситиһиилээхтик кыттыбыт дьиэ кэргэттэр, биирдиилээн дьаныһан дьарыктанар энтузиаст дьон кыттыбыттара. Сэлиэнньэ бэтэрээннэрин сэбиэтин бэрэссэдээтэлин солбуйааччы Елена Захарова өрөспүүбүлүкэҕэ Үлэ, улууска Тыа хаһаайыстыбатын сылларынан үлэ бэтэрээннэрин сынньатар баҕалаах тус санаатын олохтоох дьаһалтаҕа тиэрдэн дьаһалта биһирэбилин ылбыт.
Елена Тимофеевна көҕүлээһининэн “Дьокуускай-Москва-Дьокуускай” хайысханан “Бэс Чагда” санаторийга сынньанар чэпчэтиилээх путевканы кэпсэтиһэн булбуттар. Путевка 80 %-нын улуустааҕы социальнай управление төлөөбүт. Дьаһалтаҕа тыа хаһаайыстыбатын исписэлииһинэн үлэлиир Марианна Федотова докумуоннары оҥорууга көмөлөспүт.
Бу күн сыл түмүгүнэн ирдэниллэр балаһыанньаҕа бары өттүнэн эппиэттиир, бастыҥ көрдөрүүлээх, 65-тэн үөһэ саастаах бэтэрээннэрбит Федора Семеновна, Егор Егорович Белолюбскайдар, Анна Николаевна, Василий Николаевич Романовтар, Мария Афанасьевна, Петр Афанасьевич Захаровтар дьиэ кэргэттэр, Ангелина Егоровна Скрябина, Семен Григорьевич Никаноров, Анна Ильинична Брызгалова, Раиса Николаевна Петрова уонна Валентина Ивановна Санникова “Бэс Чагда” санаторийга барар чиэскэ тиксэн путевкаларын, билиэттэрин туттулар.
Баһылык Алексей Неустроев: “Маннык тэрээһини Майаҕа бастакытын ыытан эрэбит. Эһиги бастакы хараҥаччылар буолаҕыт. Көтөр күҥҥүтүгэр дьиэҕититтэн аэропорка массыына тиэрдэн биэриэҕэ. Элбэх саҥа доҕоттору билсэн, чэгиэн сылдьан үчүгэйдик сынньанан кэлэргитигэр баҕарабыт” диэтэ. Елена Захарова уонна Марианна Федотова бэтэрээннэригэр “Внуково” пуортан санаторийга илдьэр тырааныспар кэпсэтиллибитин иһитиннэрэн, бэйэлэрин кытта тугу илдьэ, хайдах таҥнан баралларыгар тиийэ сүбэлээтилэр итиэннэ этэҥҥэ сылдьан элбэҕи көрөн-билэн кэлиҥ диэн алҕаатылар.
Бастыҥ тиэргэннээх аҕам саастаах дьоммут сынньалаҥы көҕүлээбит Елена Тимофеевнаҕа уонна өйөбүлүн иһин олохтоох дьаһалтаҕа махталларын биллэрдилэр итиэннэ “Бэтэрээн тиэргэнэ” куонкурус сыллата салҕанарыгар баҕа санааларын эттилэр.
Марелла Баишева.
