Балаҕан ыйын 19 күнүгэр Егор Кычкин аатынан Матта орто оскуолатын үөрэнээччилэрэ «Сохраним лес» Бүтүн Арассыыйатааҕы аахсыйаҕа кытыннылар.
6‒11 кылаас уолаттара уонна оскуола үлэһиттэрэ, оскуола таһынааҕы учаастакка 15 маһы олортулар. Нэһилиэкпит олохтоохторо Романова Наталья Гаврильевна 6 боярышник, Брызгалова Октябрина Николаевна 1 боярышник, Кычкина Татьяна Семеновна 4 тэтиҥ, 4 хатыҥ оскуолабытыгар бэлэх ууннулар.
Быйыл Арассыыйа араас эрэгийиэннэригэр 70 мөл. мас олордуллара былааннанар. Тыа ‒ планета тыҥата уонна биһиги дойдубут сүрүн баайа. Хомойуох иһин, ойуур маһа кэрдииттэн уонна киһи дьалаҕайыттан эмсэҕэлиир. Биһиги бэйэбит кыахпытынан, күүспүтүнэн баай тыабыт, айылҕабыт ылбыт эчэйиитин көннөрөргө, чөлүгэр түһэрэргэ көмөлөһүөх тустаахпыт. Дойдубут айылҕатыгар эппиэтинэстээхтик, харыстабыллаахтык сыһыаннаһар дьон буола үүнэбит.
Матта оскуолатыгар үтүө үгэс баар. Сыл аайы үөрэнээччилэр маһы олордууга кытталлар. Күөх тыабытын харыстыах тустаахпыт.
Сандара Захарова, 7 кылаас үөрэнээччитэ, «Куорсун» медиакиин.
