В.П. Ларионов аатынан Майа орто оскуолатын үөрэнээччитэ Алеша Павлов оҥорбут «Бул, тал, кыай» диэн остуол оонньуутун биһиги оскуолабытыгар кэлэн оонньотто, бэлэх уунна. Алеша бу оонньууну ийэтин кытта толкуйдаабыт эбит. Бу оонньуу өрөспүүбүлүкэ улуустарын, гиэрбэлэрин туһунан билиини чиҥэтэр, сырдатар ис хоһоонноох эбит. Маны таһынан, Майа сэлиэнньэтин бэлиэ сирдэрин, тутууларын туһунан кыра кинигэлээх эбит.
Биһиги 8-10 кылаас үөрэнээччилэрэ кыттыыны ыллыбыт. Бастакы түһүмэххэ кыайбыт 20 оҕоҕо оонньуу ааптара, бу оонньууну бэлэх уунан үөртэ. Финалга үс оҕо күөн көрүстүлэр, олор кэккэлэригэр мин однокласснигым Володя баара. Бу финалга киирбит оҕолор оскуолабыт хамаандатыгар сүүмэрдэнэн, улуус күнүгэр ыытыллар оонньууга кытта барыахтара.
Бу маннык остуол оонньуута олус интэриэһинэй эбит. Толкуйдуур дьоҕуру сайыннарар. Өссө да маннык курдук, сахалыы остуол оонньуулара тахсан истиннэр.
Сивцева Николина, Павловскай орто оскуолатын медиа киинэ
