Олунньу 7 күнүгэр 2023 сылга бүттүүн Арассыыйа үрдүнэн биллэриллибит Педагог уонна настаабынньык сылын үөрүүлээхтик сабыы, ону тэҥэ улууска үөрэхтээһин 150 сыллаах бэлиэ түгэнин тэрээһинэ буолла.
Сыл устата Мэҥэ Хаҥалас улууһугар 15 араас хайысхалаах тэрээһиннэр ыытылыннылар, 200 педагог кыттыбыт. Ол иһигэр хамаанданан куонкурустар, марафоннар үрдүк тэрээһиннээхтик, көхтөөхтүк ааспыттар. Сыл устата ыытыллыбыт идэлэринэн таһымнаах куонкурустар, күрэхтэһиилэр кыттыылаахтарын, кыайыы үрдүк чыпчаалын ситиспит киэн туттар педагогтарбытын үөрүүлээх быһыыга-майгыга чиэстээтилэр.
150 сыл анараа өттүгэр Илин Хаҥалас улууһун Ороссолуода сиригэр-уотугар аан маҥнайгынан «Сайдыы суола ‒ үөрэххэ, үөрэх төрдө ‒ оскуолаҕа!» санаанан салайтаран, үйэлэр уларыйыыларын өтө көрбүт, 25 сыл Илин Хаҥалас улууһун кулубата, Бочуоттаах инородец, мэссэнээт, биир дойдулаахпыт Герасим Иванович Соловьев улахан олугу уурбут, Мэҥэ Хаҥалас улууһун үөрэхтээһинин бүгүҥҥү күҥҥэ сайдыытын сахпыт. Илин Хаҥалас улууһугар маҥнайгы оскуола тэриллиэҕиттэн үгүс кэм өрүс сүүрүгүнүү устан ааста, үөрэҕириигэ элбэх уларыйыылар буоллулар. Ол эрээри учуутал, иитээччи, уһуйааччы оруола уларыйбатах. Кинилэр ‒ тыа сирин интэлигиэнсийэтин чаҕылхай бэрэстэбиитэллэрэ, оҕолорбутун үөрэтэн, иитэн-такайан олох киэҥ суолугар таһаараллар. Бүгүҥҥү бэлиэ түгэҥҥэ Мэҥэ Хаҥалас улууһун оскуолаларын, уһуйааннарын салайааччылара улууска үөрэҕирии тиһигэ тэриллибитэ 150 сылын уруйдаан саҥа ырыаны сүрэхтээтилэр. Ырыаны педагогическэй үлэ бэтэрээнэ, Российскай Федерация үөрэҕириитин туйгуна, «Саха-Азия оҕолоро» пуонда стипендиата Лидия Андросова, СӨ култууратын туйгуна Прокопий Федоров суруйбуттар.
СӨ Ил Түмэн Судаарынньыбаннай мунньаҕын Наукаҕа уонна үөрэҕирнигэ сис кэмитиэтин бэрэссэдээтэлэ Антонина Григорьева, С.Н.Донской аатынан Үөрэх сайдыытын уонна идэни үрдэтии институтун дириэктэрэ Ньургун Павлов, улуус баһылыга Дмитрий Тихонов, улуус үөрэҕириигэ управлениетын начаалынньыга Гаврил Толстяков, улуустааҕы үөрэх үлэһиттэрин боропсойууһун бэрэссэдээтэлэ Иннокентий Скрябин эҕэрдэлээн бэлиэ наҕараадалары туттардылар.
Сыл саҕаланыыта үөрэҕирии тиһигэ тэриллибитэ 150 сылыгар аналлаах бэлиэ оҥоруутугар куонкурус биллэриллибит. Куонкуруска Казань, Красноярскай дизайнердара, улуус бары үөрэнээччилэрэ уонна учууталлара кыттыбыттар. Кыайыылааҕынан «Кэрэли» эбии үөрэхтээһин киинин 2 №-дээх Аллараа Бэстээх оскуола учууталлара Ольга Зедгенидзева, Нарыйа Прохорова ааттаммыттар. Саҥа сыл бэлиэтигэр ааптардар табыллыыны, дьолу, эрэли, муударай буолууну бэлиэтиир өҥнөрү дьүөрэлээбиттэр. Саҥа сыл бэлиэтин сыанаҕа таһааран, бары сэргии, кэрэхсии көрдүбүт. Мэҥэ Хаҥаласпыт үөрэҕириитин тиһигэ үс үйэни уҥуордаан сайдан кэллэ. Хас биирдии үөрэх тэрилтэлэригэр саҥаны киллэрии инники күөнүгэр Учуутал турар. Кини күннэтэ толорор, сороҕор көстүбэт, сороҕор ситэ сыаналаммат дьаныардаах үлэтэ баар буолан сахабыт норуота сайдар, тапталлаах улууспут инникигэ эрэллээх.
Елизавета НЕУСТРОЕВА.
