Мэҥэ Хаҥалас улууһугар доруобуйаларынан хааччахтаах оҕолору үөрэтэр Д.Ф.Назаров аатынан Өлөчөйдөөҕү интэринээт-оскуола 1969 сылтан кэскиллээхтик үлэлиир. Ааспыт 2022 сылга IV Бүтүн Арассыыйатааҕы доруобуйаларынан хааччахтаах оҕолору өйүүр «Современная школа» бырайыак «Доброшкола» куонкуруһугар ситиһиилээхтик кыттан 7 мөлүйүөн 400 тыһыынча солк. суумалаах аныгы үөрэх тэриллэрин ылары ситиспитэ. Суолталаах бырайыакка кыттыыны оскуола дириэктэрэ Поликарп Билюкин сүрүннээбитэ.
Быйылгы үөрэх дьылыгар дириэктэринэн анаммыт Петр Шестаков салалтатынан саҥа үөрэх тэриллэрин аҕалан таҥнылар, кабинеттарга өрөмүөн үлэтин ыытыы тэрээһиннээхтик барда. Интерактивнай дуоска, панель, 3 Д принтер, иистэнэр массыына, саҥа бэрэстээк остуоллар тустаах миэстэлэрин булан үлэҕэ бэлэмнэр.
Учуутал күнүн көрсө алтынньы 3 күнүгэр саҥа хааччыллыбыт кабинеттары арыйыы үөрүүлээх түгэнин бэлиэтээтибит. Дьоро күнү Валентина Петрова сахалыы тойугунан арыйда, ыраастаныы сиэрин-туомун ыытта. Ыҥырыылаах ыалдьыттар улуустааҕы үөрэх управлениетын начаалынньыгын солбуйааччы Андрей Захаров, улуустааҕы «Кэскил» психолого-медико-социальнай арыаллааһын киинин дириэктэрэ Матрена Птицына, «Алтан нэһилиэгэ» муниципальнай тэриллии баһылыга Николай Матчитов, Алтан орто оскуолатын дириэктэрэ С.тепан Посельскай, Өлөчөйдөөҕү сынньалаҥ киинин дириэктэрэ Поликарп Билюкин оскуола кэлэктиибин эҕэрдэлээтилэр, баҕа санааларын эттилэр.
Кэрэ бэлиэ күнү оҕолорбут эҕэрдэ нүөмэрдэрэ киэргэттэ. Үөрүүлээх чаас кэнниттэн ыалдьыттар логопед, психолог, иис, ЛФК кабинеттарыгар, үлэ мастарыскыайыгар турбут саҥа үөрэх тэриллэрин көрдүлэр-иһиттилэр.
«Үтүө санаа оскуолатын» дьоһун бэлэҕэ оҕолорбут үүнэн-сайдан олоххо бэлэмнээх буолан тахсыыларыгар төһүү күүс буола туруоҕа диэн эрэнэбит.
