Саха буолан сандаарын, киһи буолан килбэйиҥ,
Өбүгэбит үгэһин умнубакка өрө тутун,
Кыра оҕо эрдэхтэн саха тыынын иҥэриҥ!
Балаҕан ыйын 27 күнүгэр В.П. Ларионов аатынан Майа орто оскуолатыгар, Саха Өрөспүүбүлүкэтин Судаарыстыбаннаһын күнүн бэлиэтээтилэр.
Саха АССР XII ыҥырыылаах Үрдүкү Сэбиэтэ балаҕан ыйын 27 күнүгэр 1990 сыллаахха Саха Өрөспүүбүлүкэтин Судаарыстыбаннай суверенитетын туһунан Декларацияны ылыммыта. Бу күн Саха сирин норуоттарын уопсастыбаннай-бэлитиичэскэй өйүн-санаатын уһугуннарарга, үөрэҕи-билиини тарҕатарга, норуоттар тэҥ бырааптаныыларын, бэйэлэрин салайынар уонна судаарыстыбаннастаах буолууларын ситиһэргэ, демократическэй уларыйыылары киллэрэргэ туһуламмыт либерально-демократическай хамсааһыныгар олук уурбут дьоммут — Максим Аммосов, Платон Ойуунускай, Исидор Барахов, Василий Никифоров уонна да атыттар ааттанрын махтанан ааттыыбыт.
Оскуолабытыгар бэлиэ күммүт саха сиэринэн алгыстаах алаадьынан айах тутан оҕолору, учууталлары, ыҥырыылаах ыалдьыттары көрсүүттэн саҕаланна. Үөрүүлээх күҥҥэ эҕэрдэ тыл эттилэр: В.П Ларионов аатынан оскуола дириэктэрин эбээһинэһин толорооччу Васильев Павел Васильевич, Мэҥэ Хаҥалас муниципальнай тэриллии баһылыгын бастакы солбуйааччы Михайлов Василий Васильевич, “Майа сэлиэнньэтэ” тыа сирин дьаһалтатын баһылыгын солбуйааччы Санников Вячеслав Иннокентьевич, Мэҥэ-Хаҥалас улууһун үөрэҕириитин сүрүннүүр исписэлииһэ Тарасов Николай Петрович. Бу күн төрөөбүт дойду туһунан элбэх хоһоон ааҕылынна, саха тылын учууталларын мэтэдиичэскэй холбоһуга бэлэмнээбит матырыйаалларынан оҕолор хас тохтобул (перемена) аайы араадьыйанан бэлиэ күнү сырдатан кэпсээтилэр, саха үҥкүүтэ, Саха сирин “Өрөгөй ырыата”, хомус алыптаах дьүрүскэн дорҕооно дуораһыйда, уолаттар уус-уран хомуһуннаах хоһуйуулара сатараата. Судаарыстыбаннас күнүгэр өйдөбүнньүгү байыаннай-патриотическай кулууп иитиллээччилэрэ уонна сибэкки дьөрбөтүн ыҥырыылаах ыалдьыттар, учууталлар уурдулар!
Светлана Ефимова
