Тохсунньу 28 күнүгэр Төҥүлү уонна кини тула нэһилиэктэри аһынан-үөлүнэн, хаһаайыстыбаҕа туттуллар табаарынан, араас атын өҥөнөн хааччыйар урбаанньыт Иван Борисов “Айылгы” балаҕаныгар 2023 сыллаах үлэ түмүгүнэн тэрилтэлэрин үлэһиттэригэр дьоро күнү бэлэхтээтэ.
Манна СӨ Урбаан, эргиэн уонна туризм миниистирэ Тимур Ханды норуот маастара, тимир ууһа Леонид Говоров мастарыскыайыгар, “Сайдам” уопсастыбаннай түмсүүлэр кииннэригэр сылдьан үлэлэрин билистэ, инники былааннар, соруктар туруорулуннулар. Миниистир үтүө суобастаах үлэлэрин, идэлэригэр бэриниилэрин уонна аччыгый уонна орто урбаан сайдыытыгар кылааттарын иһин 15 бастыҥнарга наҕараадалары туттарда. Асчыттар Ирина Захарова, Дария Максимова, Людмила Стручкова, буҕаалтыр Евгения Захарова, атыылааччы Акулина Трифонова, суоппардар Прокопий Скрябин, Артем Борисов о.д.а. бэлиэтэннилэр.
Төҥүлү нэһилиэгин баһылыга Петр Эверстов эргиэн министиэристибэтин мэтээлин урбаан үлэтин сайдыытыгар кылааттарын иһин асчыт Анна Рееваҕа, кассирдар Любовь Сметанниковаҕа, Айталина Петроваҕа туттарда.
Урбаанньыт Иван Иванович “Үлэлиир киһи кэмигэр бэлиэтэниэхтээх” диэн бигэ өйдөбүллээх. Кини норуот маастардарыгар Надежда Оконешниковаҕа, Александра Баишеваҕа “Бэйэтин дьыалатын маастара” ааты кытта сибэккилэри, өйдөбүнньүк бэлэхтэри туттарда.
Үлэ дьонугар аналлаах дьоро киэһэни Галина Эверстова иилээн ыытта, эстрада ырыаһыттара Кирилл Матвеев, Еремей Гоголев, Линда ыалдьыттаан ырыаларын-тойуктарын бэлэх ууннулар.
И.И. Борисовы бииргэ үөрэммит доҕотторо уонна төрөппүт оҕолоро эҕэрдэлээтилэр. Уола Юрий Борисов аҕатын “Нал”, “Уют” кафеларын, “Сатал” маҕаһыын үлэһиттэригэр анаан бэйэтин дьиэ кэргэнин аатыттан тэлэбиисэрдэри бэлэх уунна, 4 суоппардарга харчынан уонна малынан Туоһу суруктары туттарда. Иван Иванович суоппардарыгар массыына анныгар сытан өрөмүөннүүллэригэр аналлаах тэрили бэлэхтээтэ.
Үлэһиттэр күүстэринэн сылын аайы ыытыллар көрдөөх-нардаах Саҥа дьыллааҕы оонньуу туруорулунна. Сүүйүүлээх лотерея, ол үрдүнэн 6 сыаналаах бириистэр оонньоннулар. Холодильник, морозильник, ларь, тэлэбиисэр, истиэҥкэ миэбэл, хомуот хаһаайыттарын буллулар. Бу үөрүүлээх тэрээһин сонунун миэхэ хаһаайыстыбаннай маҕаһыын атыыһыта Лена Тастыгина сырдатта.
Марелла Баишева.
